Kichutip WEC-i Govt. Primary School Kichutip tobur junga yanglushitsüogo

Mokokchung, July 24 (TYO): Classroom nunga tamen mejungi tzünglu senlokba den school kilem rangben tereprangtsü mejungi tejen küma raksamar aliba reprangteta, züngsem 13 aliba Kichiutip Ward Education Committee (WEC)-i ward yimten den asüngdangteper kiyong nung temulung tenla bendena Government Primary School Kichutip, Mokokchung tobur junga yanglushitsüogo.
Government Primary School Kichutip, Mokokchung ya sangküm (2018) February nung Hon Jubilee amungtsü. Yamaji 1968 küm mesemtetba school ya Class A nungi 5 (class-5-jibo upgrade mesüteti tanü tashi arur) tashi aser tang tezüngdakpur shisaluyimer 46 den teacher-incharge densema tesayur 14 lir.
“School nung Class-5 yangluloktsü atema 2016 DPDP senden nunga approved süogo saka tanü tashi department-i mapa küma inyaktsüba mali. Ibaji dang masü 2004 nungi joko SSC grant, teachers grand mesüra school maintenance amala teyari kecha marur. Item ajak timtem asadangba sülen Kichutip WEC ajanga yimten den asüngdangteper kiyong nung temulunger tenla ajak senteper senpak 64,000 bendentetba den kiyong nung tulur kati senpak 20,000 den kilem nung anütsü rong (color) liter 80 tashi tenla agütsüba amshia anogo 8 tsüngda school nung rong tepshia aser kishi, kijiba (window) ajak melenja maparen ya tembang,” ta Kichutip WEC chairman, Tsükjemwati-i lemsatepa liasü. Paisa, oda tanga school-tem ama mid-day meal-bo arudar saka tanurtem nem item chiyungtsü anganüa agütsür sorojoker nema department ajanga küm asembuba itasen magütsüi okronga toktsüba temulung masüba olen ka paisa shisema liasü.
“Tarutsü alima lenitsüpurtem yangtetdak riju atema department-i iba ama temulung magütsüi senzüka toktsüba yagi asen kin jenjang memeteti telungisa lujen ludaktsür aser iba takoksa süngjangji asenisa agitsü. Anungji school nung nüngdakba kechisarina ajak abensaja tzü meseni yujang ta Kichutip WEC-i department dangi takhangba ola yoker” ta paisa Kichutip WEC meyonga jembidang shia liasü.