Assam & AP nung tzümetsüng tamajungba akümer

Guwahati/Itanagar, August 22 (Agencies) : Assam kübok Kokrajhar district nung tzünglu kanga aruba ajanga tzümetsüng timtem tulu ajuruogo.
Army-i ashiba agi parnoki Bongaigaon aser Kokrajhar district tem nungi nisung 1,500 tashi kümzükogo aser state ketdangsertemi ano anogo ananü tashi nung tzümetsüng tamajungba akümtsü ta metetdaktsüogo.
Hokolbar aonung gari ka nung nisung pungu mener aodang Dhubri District nung aliba Gouranga ayongi tsüoka ai aser parnok rongnung tetsür kabo kümzükogo aser tanüngba nisung pezü bushidar ta osang angazüker.
Assam kübok district 15 nung nisung lakh 5 tema tzümetsüng ajanga timtemer aser Lower Assam nung Army column trok tashi rescue & relief atema mapa lemzüktsüogo.
Ano külen Assam nung aliba Kaziranga National Park nunga tzümetsüng ajanga shirurutem tenemlen bushia aoer ta osang angazüker.
Tanü tashi nung shiruru asüba osangbo mali saka park ketdangsertemi ozüng anema shikarirtem kanga junga mittsü tenzükogo.
Arunachal Pradesh nunga district ana – Namsai aser Lohit nung tzümetsüng ajanga nisungtem timtemer.