Naga People’s Front-i jangjashitsür

Dimapur, July 24 (TYO): Dr Shurhozelie Liezietsu dang Chief Minister indang official residence azüngtetjang ta shidi ka yokogo ta local media nung metetdaktsü aser tanep iba shidiji Dr Shurhozelie ket atong, saka shidi ano melapok tsüngda TR Zeliang-i CM residence nung mesemtetogo ta social media nung osang prokshi, ta Media & Press Bureau NPF-i sangdong ka nung metetdaktsü.
Dr Shurhozelie-i July 22, 2017 nü CM residence toktsü aser kasa anogo nung par Ruleizou nung aliba kidang Thanksgiving-cum-Homecoming sentong ka ayongzüka agiba den senden ka amen. Iba osangji local aser national media nung jangjajangja metetdaktsüogo, ta NPF sangdong nung shia lir.
Maneni, Works & Housing department nem Chief Minister official residence reprangdaktsütsü aser teraksa mesüra tesamaba kecha mali ta kuli sayutsü atema nisung ka yutsü, ta parnokisa ashi.
Honibar nikongdang 2:00 ako süia Dr Shurhozelie’er kidang sendenji amen aser iba jagi Bayavu Area Panchayat-i ayongzükba Common Platform sentong nung Party tir medentet aser pa melena MLA Kuzholuzo Azo Nienu yok.
Ajisüaka, Dr. Shurhozelie-i asaa Common Platform nung maden ta osang kar prokshi saka ibaji tai lir. Bayavu Area Panchayat aser idakji alirtemi Clean Election nükjidong nung iba sabang ya ayongzükba liasü saka osang tiyazü prokshiba ajanga parnok temulung yirutsütsü akok, ta Media & Press Bureau-isa metetdaktsü.