DUCCF-i jangjashitsür; Agent inyak ta asüba magizüker

Dimapur, July 24 (TYO): Hombarnü Lengrijan Council Hall, Dimapur nung DUCCF rongdak lokti senden ka ayonga amendang July 24, 2017 nü osangkaket nunga adokba ama GPRN/NSCN-i DUCCF Tir dang nungi telangzüba meshiba indang onük benoka olemtep.
Tanü telungpur telok balalai, saru balala meshiba tensa ka nung October 31, 2013 nü Naga public-i ‘Sorkar Ka Saru Ka’ lemtetba nung DUCCF-ia pusema nungiter aser iba tangatetba ya Linük nüjiso bushirtem ajak sabang ka nung longjemdaktsübüba atema lir, ta Media Cell, DUCCF-i sangdong ka nung metetdaktsü.
Naga Yimten Tebilemtsü asoshi teti atema telemtetba ka agitsü atema inyakba mapa nung DUCCF-i pusema nungiter. Naga nungeri mulunga inyakba mapa ajak onoki pusema nungiter. Anungji, Naga nungeri ola adokba ama DUCCF-i maparen ketdangsüa inyaker. Maneni district administration-ia saru magütsütsü indang tetuyuba agüja lir aser iba jagi DUCCF-i registered body ka ama iba tetuyuba sülen anidaktsüsa akümer, anungji saru saruba inyakyim ya anentsüla, ta sangdong nungsa metetdaktsü.
GPRN/NSCN ketdangsertemi Army Ration Tax saruba nung tashiyim meinyak mesüra amokmeren masü ta osang sangdongba atema DUCCF-i süoki ia bilemer aser iba osang jangjashitsür. Iba onük atema tesüiba mapang GPRN/NSCN ketdangsertem den timi dang tongtepratepa aru saka ano DUCCF züngsem kar amokmeren asü ta jembibaji tiyazü masü, ta Media Cell-isa ashi.
July 16, 2017 nü DUCCF tir kidang GPRN/NSCN ketdangsertem den senden amendang, sendenji timi dang tenzüka agi saka GPRN ketdangser kati senden nung dena alirtem dang ‘shirnoki saru agütsütsü memulunger, teka metongang aser nenok camp-i anir oa parnok temapur dang saru magütsütsü indang kuli agütsüdaktsütsü ta asüba sülen senden —–
Ano, senden tagidak nung Indian security force kar aru aser onok dang Naga Yimten Telok nungi züngsem kar senden nung lir ta ashi, saka onoki mali ta DUCCF nung züngsem kar Indian army indang agent ama inyak ta tai tongloktsübaji onoki magizüker.