Ao kin dangi Khristan yimsü aruba kaket ka saya

Dimapur, July 24 (TYO) : Yisu yimsü marudang Naga tenem nung alirtemji yimten yimli aser alima tasazük kecha benteta maka shiruru ama dang liasü saka Yisu osang tajung arur külen dang itemji nüchi aküm ta ABAM tir aser Ungma Baptist Arogo nung sannüker, Rev.Dr. Noklen Longkumeri metetdaktsü.
Pai iba o ya tanü Hombar nikongdang DABA Office Chiyongdak, Wt.Tiala Imcheni züluba “Ao Kin dangi Khristan yimsü aruba,” kaket ka sayatsüdang metetetdaktsü.
Ao kin ya tangar kintem dangi osangtajung bener aotsü shimtetba purtem lir, saka tanü asenoki Tsüngrem temeim amadokba agi alima tamajung kümdaktsüogo ta paisa ashi.
Iba kaket nung aliba arogotem tenzükba otsüji Tsüngremi Ao kin meimba otsü lir. Kaket zülur ya khuret akaba tetsür ka lir, iba khuret jagi nübortem nem Tsüngrem temeim nenshia metetdaktsütsü asoshi iba kaket züluogo ta paisa kaket zülur nüng sanga ashi.
Iba kasa sentong nung kaket pusema o ka ashidang, taoba ABAM Executive Secretary aser tang DBC principal, Rev.O.Alemi “Dr.Clark mezüng limapurtemi Ao limai anir atuba otsü aser asenoksasa asenoki tenla ki yangluba aser osang tajung bener mulungsua tangar kintem dangi aoba otsütem yabo Naga nunger ajak nem züngdaktsüner,” ta metetdaktsü.
Iba kaket tapak 469 nung nung Ao arogo 34 tenzükba otsü shia lir. Tang tashi iba kaket zülur, Tiala Imcheni züluba kakettemji Prayer Tower, Nokinketer Imtichujang, Ao Lima Nüktzü aser Tanülai Azüokba Jakla kakettem asütsü.
Lai tang züluba kaket ya ita ti shi agia zülu. Iba kaket jenjang ya sen Rs.550/ lir aser tesem balala nung angutsü. La den tongteprateptsü asoshi cell phone number 9856072258 ajanga akoktsü.