Kabul anülulen gari bomb ka apok, nisung 24 asü

Kabul, July 24 (Agencies): Hombarnü Afghanistan yimtiba Kabul anülulen sorkar mapa inyaker nisungtem anir aoba bus ka nung bomb bena aliba gari ka arua atsük, aser iba lendong nung nisung 24 asü aser 42 yiru, ta yimti ketdangsertemi metetdaktsü.
“Ministry of Mines nung inyaker staff tem anepdang mapai anir aoba bus nung bomb bena aliba gari kati arua atsük,” ta Interior Ministry indang odongtar, Najib Danish-i osangbener dang ashi.
Iba lendong agütsüba ya telungpur telok katia tenüng agia mali saka iba linük nung tawa-tanü tsüngta Taliban teloki lendong agüja arudagi.
Tanü iba bomb apokba tesem nung Shiite Hazaras nisungtem timba lir aser item nisungtem ya Afghan linük nung kin tila asüba ajanga reshikangshi timtem aiben ajurua arur.
Iba lendong adalokba ya yimden yimsüsür tejangja, Mohammad Mohaqeq’er ki anasa lir. Mohaqeq’er ki adongtsü anasa aliba mezüngbuba checkpoint nung iba bomb ya apok aser iba lendong nung civilian tem aika asü aser aika yiru, ta Mohaqeq indang odongtar, Omid Maisom Mohaqiq-ia ashi.
Kabul nung mapang shia suicide bomb aser kiralongra mapa ajangshia arudagi.
2017 küm tenzüker ita trok tsüngta Afghanistan nung civilian 1,662 tepsetogo aser 3,500 dak tali yirutsüogo, ta iba linük nung 2009 nungi tenzüka civilian tem tepseter asadangba telok, UN Assistance Mission in Afghanistan (UNAMA) ajanga tawa sangdongba osang nung shia lir.
May ita tatemlen Kabul nung anepdang nisungtem nungtepba mapang bomb bena aliba truck ka apok aser iba mapang nisung 150 dak tali tepset aser 100 dak tali yiru.
2017 küm tetenzüklen ita trok tashi iba ama azüdokshi aruba ajanga Afghanistan tir, Ashraf Ghani indang sorkar inyaksangshi nung tetsükdaktsü ajurur aser talisa May ita Kabul nung lendong agütsüba sülen yimden yimsüsüba nunga makmakshimak tenzükogo.
May nung iba lendong adalokba sülen nüburtemi Ghani sorkan ya tashi mait aser nüburtem kümzüka meyiteter, ta aija nokdakdang azüdokshi adoka arudagi.