India arrtsülen nungi mitkartem agientsüla: China

Beijing, July 24 (Agencies): Linük ana tsüngta raktepa aliba Himalayas tenem nungi India nunger mitkartem agientsüla aser arrtsü nung New Delhi indang tia medendangtsüla, ta China-i ashi.
Bhutan-i par litsü, ta ashiba Doklam plateau nung linük ana nungi mitkartem 300-shi metre 150 tsüngta tejak o tejak chitepa ajurutep, ta India nunger ketdangsertemi ashi.
Iba tesem nungi India arrtsü leni China nunger mitkartemi June ita nung lenmang yanglu tenzükba sülen linük ana tsüngta arrtsü mechi mangatettep tali adok.
Bhutan-i India dang teyari meshiba ajanga Sikkim nung aliba India nunger mitkartem iba tesem-i yok.
Doklam plateau nung China nunger indang temeden litsü kümzüka ayutsü asoshi Beijing-i molungtetba ya India-i nema lua mebilemtsüla, ta Chinese defence ministry indang odongtar, Colonel Wu Wian-i Hombarnü ashi.
“China-i linük kümzüka ayutsü aser temeden asoshi nokdaktsü molungteta aliba ya anokshitsütsü makok,” ta Wu-i osangbener dang ashi.
“India nunger dang ya dang shinür, nünok tia asoshi iba linük nung teranglok,” ta pai shisem.
“China-i tanüngba linüktem tebilemba masadangi iba tesem nung mera tasen agira, India nunger asoshi tebilemdangtsü lir,” ta India External Affairs Minister, Sushma Swaraj-i taoba hopta Parliament nung ashi.
Doklam plateau ya India litsü nung maden, saka China-i iba tesem nung kiojen yangluba atema süoki ia bilemer aser iba tesem nungi ‘chicken neck’ ta ajaba, India aser northeasternstate tem sendaktepdaktsüba tesem ya mela mela tongteter.
Iba tesem nungi China nunger indang mitkartem agiener tangatettep kati arutsü asoshi India-i ashir.
“Tenem ka anokshitsütsü ya temela, saka People’s Liberation Army anokshitsütsü bo tasak asütsü,” ta Wu-i shisem.
“Aibelena aliba melenshitsü asoshi India-i mapa inyaktsü atema ajungshir aser linük ana tsüngta yimjung alitsü asoshi inyaktsüla,” ta Wu-i maneni ashi.
China aser India tsüngta arrtsü kilometre 3,500 lir, aser iba nungi tesem talangba nung linük ana tsüngta mangatettep adoka lir.