CTN nung Aor chanui kou mejeper

Dimapur, July 25 (TYO): Asenok sobaliba nung kou mejepba mali asü, kechiyong asenok akhi tsüraburtem nok techira agi koubangtsüng dang tsünga aru, iba jagi tanü tashi kou mejepba mapa yabo asenoki tsümartem mapaa amato bilema parnok nem dang sen aadaktsür.
Ajisüaka, Changtongya town nung Aor chanu anati kou mejepdak ki lapoka kou mejeptsü tenzükogo. Tena rongnung ka Changtongya nunger Talikümzük. Pa ya arishi küm 31 lir aser Changtongya town nung Daily market nung pa kou mejepba kiji lapoka lir. Iba ama Naga nunger chanu kati peisasa pei akok mapa inyaka sen aatsü tenzükba ngua pelaba agi Town council-i pa dang ki bara memeshir.
Wb.Talikümzük ya kou mejepba training agiba nisung ka masü saka pasasa angazüka inyakba nisung ka lir. Pai Deobar dak alaka anogo shia anepdang 7:00 ako nungi nikongdang 4:00 ako tashi kou mejeper.
Ano, kou mejeper kaji Longpa nunger Merajungshi lir. Pa kou mejepba ki ya Changtongya town nung Church ward nung lir. Pa yaa pasasa kou mejepba yimya angazüka inyakba nisung ka lir.
Yaküm küm nungi Changtongya town nungsa Longchara Baptist Arogo nung lanurtemi kou mejepdak tesem ka lapoka nisungtem kou mejep tenzüka liasü.
Tangbo Changtongya town nung tsümar kou mejeper kata mali kümogo.