International Children’s Film Festival India, Nagaland 2017 amungtsü

Dimapur, July 25 (TYO): Nagaland Board of School Education (NBSE)-i tang mezüngbuba atema Nagaland nung International Children’s Film Festival, 2017 ayongzüka amungtsü.
Iba benjung ya July 27-29 tashi Regional Centre of Excellence for Music & Performing Arts (RCEMPA), Jotsoma nung amungtsü aser Children’s Film Society of India (CFSI), Ministry of Information & Broadcasting-i teyari agütsür.
“Nagaland ya jangratemtsüka lir aser iba benjung nung tanurtem ajangshibaji kodanga mamatsüsa asütsü imlar. North East indang sobaliba aser yimyatem nungi aika angazüktsü lir ta ni bilemer aser ano iba tesem nungi tanurtem international cinema den shiyuteptsüji kanga nüngdak lir” ta CFSI CEO, Dr. Shravan Kumar-i ashi.
International Children’s Film Festival, 2017 ji CFSI CEO Dr. Shravan Kumar aser NBSE Chairman, Mrs. Asano Sekhose nati lapoktsütsü.
Benjung lapokba sentong nung Benreu Students Union, Kohima-i Zeliang Folk Dance aitsü aser Music Topper, HSLC Examination 2017 Neingusalie Yano-i ken ka atentsü.
Film festival nung Boudewijn Koole-i yangluba Kauwboy film mezüng sayutsü. Iba film ya arishi küm 10 tain tebur chanu kati par kibong nung timtem ajuruba indang otsü lir.
Anogoshia Russia, Germany, Netherlands, India, Taiwan, UAE aser Belgium indang film tem sayutsü aser iba ya tanurtem dang film tem ajanga alima sobalibatem sayutsü nükjidong nung lir.
Film sayuba sülen quiz alitsü aser iba nung tanurtem nem sempettem agütsütsü. Ano, art aser film-making ajungkettsü atema Rajkumar-i Little Director Workshop ta ser anogo asemnü workshop agitsü.
Iba workshop nung Nagaland nungi school kar nungi shimteta tanur 20-i shilem agitsü. Parnok nem Workshop Mentor – Rajkumar-i tesayuba agütsütsü.
Maneni, Nikhil Kulshrestha-i anogo asemnü film making workshop agitsü aser iba nung ‘The Grammar of film making, expressing your creativity through mobile phones & an overview on film making” onüktem nung ajemdaker sayutsü.
Benjung amungba piyong Delhi, Mumbai aser Nagaland nungi film mongintemi tanurtem den quiz, film appreciation sessions & discussions alitsü.
Anogo asemnü benjung nung Nagaland nungi kaketshir 1000 den tema adentsü imlar aser anogoshia sentong balala agitsü.
International Children’s Film Festival ji July 27, 2017 anepdang 10:00 ako nungi Regional Centre of Excellence for Music & Performing Arts (RCEMPA) nung tenzüktsü.