MEC-i tetsür business inyakertem atema ‘La Catalyst’ mapa tenzüker

MEC züngsemtem den ‘La Catalyst’ teyari agirtem külemi Hotel Whispering Winds nung tangokba noksa nung angur. Mokokchung, July 25, 2017.

Mokokchung, July 25 (TYO) : Mokokchung Entrepreneurs Consortium (MEC)-i achayanga tetsürtem nem sen terara aputsüba ‘La Catalyst’ ta sür maparen ka Mungulbarnü yangi Hotel Whispering Winds Mokokchung nung sentong tajung ka ayongzüka tenzükogo.
Iba sentong tenzüka Mokokchung nung tetsür business balala inyaker teshimtet parnok metsü (20) nem sen meyi tenem-nem (50,000/- each) ita nung tetemlok (interest) 1% agi aputsüogo. La Catalyst maparen moaja Süngkomen Baptist Arogo Pastor Rev. O Yashi Jamiri meshiteta sarasademtsü.
Tanü iba sentong nung MEC mendenbuba Wb. Tsükti Lkri jembidang, MEC ya meshimetsüba lokti ka masü saka agütsüba lokti ka asütsü nükjidong yur 2014 küm lanur business inyaker ishika lungjemer tenzükba lir, ta ashi.
Aji oda, taoba mapang ‘MEC – Micro Finance Initiative’ mapatong kübok local business inyaker parnok 134 nem sen crore ka shi indoka tetemlok tera agia yaritepa aruogo, tang ‘La Catalyst’ yabo tetsür business inyaker temeja asoshi lir aser iba nung yabo tetemlok kanga ajema lir, ta paisa La Catalyst indang inyakyim kar ashi.
Business ajanga dang alima ya renloktsü aser temelenshi bener arutsür, anungji, kechi business inyakdir inyakaka tezü metangi ajaki nendaka, tangar mashioktsüi ochi shia aser kati ka ajungkettsütepa inyaktsü asoshi paisa ajungshia liasü.
MEC-i Mokokchung nung “La Catalyst” maparen tenzüker ta angashia Youth Net telokia sen lakh pungu (5 lakhs) inoksemtsüba asoshi Tsüktiisa pelaba metetdaktsü.
MEC yagi mapang shia business inyakertem nem tensa den apet business junga inyaka aoba den rongsen ketdangsütsü asoshi shisatokden balala ayongzüka katsür. Iba den ano parnokisa business meranga inyakertem shimteta parnok nem teyari agütsür aser business luyim nung lenmang balala sayua arudaki. MEC telok nung ya lanur business inyaker züngsem par 9 lir.