Plastic entsü anguba indang kuli metetdaktsür

Dimapur, July 25 (TYO): July 7, 2017 nü Upper Chandmari, Kohima nung plastic entsü ta temulung melemi bilemba entsüji FSO, Kohima-i State Public Health Laboratory (Food Lab.) nung tendangtsü atema bener yok aser kanga junga tendangba sülen entsüji chichiba liasü ta bushitetogo.
Food Safety Standard Act 2006 nung Arrla 45 kübok lateta aliba ama Food Analyst-i entsü tema aser telung ajak tendanga reprang aser idangji plastic entsü ta temulung melemi bilemba entsüji plastic mesüra artificial matter agi yangluba masü ta bushitet, ta Directorate of Health & Family Welfare. Joint Director (Food Safety), Dr. Kevichusa Medikhru-i tanü sangdong ka nung metetdaktsü.
Chiyungtsü tamajung, taila mesüra temulung melemi bilembatem lira, Food Analyst, State Public Health Laboratory, Para Medical Colony, Kohima dangi yokang mesüra bangdak Food Safety Officer nem osang sangoktsü nung ajungtsü, ta Dr. Kevichusa Medikhru-isa sangdong nung metetdaktsü.