KVYO-i by-election atema metetdaktsür

Dimapur, July 25 (TYO): July 29, 2017 nü 10th Northern Angami I A/C By Election agitsü aliba atema Kohima Village Youth Organization (KVYO)-i July 22, 2017 nü rongdak senden ka amen aser free & fair election agitsü atema bangzüng kar renema ayu.
KVYO-i election agiba anogo nung polling booth ajak mita reprangtsü aser registered voter tem dak alaka bendanger shinga marudaktsütsü lemtet, ta KVYO President Medozhatuo Rutsa aser Joint Secretary Ruokuoneitso Kire nati tanü sangdong ka nung ashi.
Election timi agiba nung shilem agitsü ajungmesoa KVYO-isa registered voter tem kari danga ozüng alema mesüra tim mesüi inyaksangshiba, mesüra tensa raksatsüsa inyakra ozüng tapet agi merenshitsü, ta mendenpurtemisa ashi.
KVYO-isa by election agitsü aliba telongtet nung alirtemi ainertem manenzükdaktsütsü atema tekümdangtsü metetdaktsü aser iba nung timtem kar danga adokra, ki kiburi iba khuretji abentsü ta parnokisa shisem.
Vote agütsür ajaki KVYO-i latetba onüktem sülen anidaktsü aser July 29, 2017 nü free & fair election agitsü atema ajak dang mepishir ta mendenpurtemisa ashi.