Ram Nath Kovind-i India nung Tir 14 buba inyaktsü tenangzükba agi

July 25, 2017 nü New Delhi nung Guard of Honour ceremony nung Tir Ram Nath Kovind den taoba Tir, Pranab Mukherjee na külemi agiba noksa nung angur.

New Delhi, July 25 (Agencies): Mongulbarnü Ram Nath Kovind-i India nung Tir 14 buba inyaktsü atema Parliament Central Hall nung tenangzükva agiogo.
Chief Justice JS Khehar-i Kovind nem tenangzükba agidaktsü aser pai ‘temzüng aser ozüng wazüktsü, kümzüktsü aser lendong nungi jenbua ayutsü’ nangzükogo.
Iba sentong nung taoba Tir Pranab Mukherjee, Tatong Tir Hamid Ansari, Lok Sabha Speaker Sumitra Mahajan aser Prime Minister Narendra Modi nungertem aden.
“Ni iba mapa ya kanga dang ajemalua agizüker aser iba menden anguba atema kanga pelar. Ni kecha masüba kibong ka nungi lir aser Dr.Radhakrishnan, Dr. Abdul Kalam o Pranab Mukherjee nunger tsüngsü sülen anidaktsü maongka anguba atema kanga pelar” ta tanü Ram Nath Kovind-i Tir tenangzükba agiba sülen o jembidang ashi.
“Iba linük tulu nung senso crore 125 tsüngdang ni apudaker aser nenok kü dak mulung lema nungloktsüba mapa nung ochishia inyaktsü nangzüker” ta paisa ashi.
“India linük nung temeyoktep aliba yagi asenok tangar dang nungi khenyongi balaka kümdaktsür. Iba yagi asen linük takok angur. Asenoki alemli Bharat indang shisatsü aser tanü India indang science ajanga linük renlokdaktsütsü merangdi” ta paisa tayongzükba agütsü.
“Linüktemji sorkar kijai meyangerteter. Linük yangerba mapa nung linük nung senso shiai shilem agitsüla aser iba senmangji lanuputu nem agütsütsüla” ta Kovind-isa metetdaktsü.
“Linük yangerba mapa nung aluyimertem, tesayurtem, tetsürtem, lisopurtem, doctors, nurses, scientists, armed forces, public servant, aser senso ajaki shilem agir. Lanur kati mapa ka ngutetba aser mapa agütsür ka akümbaji linük yanger ka lir” ta paisa shisem.
“Tanü alimai India akhümtsübur. Asenoki linük ka ama tuluka ajangtetogo saka asenoki maneni talila, tajungba aser tekaraba inyaktsü nüngdaker” ta paisa ashi.
Tanü Kovind-i tenangzükba agiba sülen Rashtrapati Bhawan nung mezüngbuba salute agi aser iba sülen taoba Tir Pranab Mukherjee’er 10, Rajaji Marg kidangi pa meiner ao.
Kovind ta lawyer ka lir aser pai taoba mapang Bihar nung Angh inyak. KR Narayanan sülen pa ya Dalit nungi Tir tanabuba lir. Kovind ya BJP lennir rongnungbo mezüngbuba Tir lir.