Nitish Kumar-i Bihar Chief Minister menden yutsü

Patna, July 26 (Agencies): Nitish Kumar-i Bihar nung Chief Minister menden nungi anenogo aser iba ajanga küm ana tashi teloktep aruba Maha-gathbandhan (Grand Alliance) tembangogo.
Grand Alliance nung Nitish’er JDU, Lalu Yadav’er RJD aser Congress teloktem longjema liasü.
Tanü nikongdang Nitish-i Bihar Angh Keshari Nath Tripathi den ajurutepa pai chief minister menden yutsüba shidi agütsü.
Tanü Lalu Yadav-i par jabaso Tejashwi ji ochimashi ken o ka nung tai tonglokja aliyonga pai sorkar nung No 2 menden meyutsütsü ta ashiba sülen Nitish-i iba mapa inyakba ajanga nisung ajak aoksadaktsüogo.
“Ni shinga danga menden yujang ta mashi, saka ni Tejashwi o Lalu na dang ochimashi ken o nung tai tongloktsüba indang kuli yimjak nung metetdakjang ta dang ashi. Ajisüaka, mapa timi inyaka moutettsüsa tensa ka ajuru aser kü mulungsentsü agi ni menden yujang ta jembi” ta Nitish-i osangbener dang ashi.
Pai chief minister menden meyutsüdang Nitish Kumar-i par Janata Dal United(JDU) telok nungi MLA tem den ajurutepa senden ka amen aser pai Angh’er kidang nungi aruba sülen parnok tarutsü teinyaktsü indang osang metetdaktsütsü ta ashi.
Nitish-i menden toktsüba sülen, Bihar nung yimten maparen tasen ka inyaktsü ama ajiteter, kechiyong Delhi nunga BJP nung tongti lennirtem ajurutepa senden ka amener.
Taoba mapang Bihar BJP-i Nitish Kumar-i aniba sorkar nung medeni, tema nungi pa yaritsü mulunga lir ta metetdakja liasü.
Bihar Angh aini aotsüba sentong liasü saka Nitish-i mepishiba nung ajemdaker pa aini aotsü aliba athi. Külen Lalu Yadav-ia asüng okadaki nung nokdaktsü atema asüng Ranchi-i aotsüba liasü, saka pai tayimtsü ajanga masü saka gari nungang aotsü lemtet. Iba jagi pa ghonda ishika Patna nung amung.
July 7, 2017 nü CBI-i Lalu aser Tejashwi Yadav na ochimashi ken o ka nung tai tongloktsü aser iba atema CBI-i par ki mita ao.
Parnok telok asem külemi longjemer opposition ama nokdakbaji Prime Minister Narendra Modi-i tsübur aser iba jagi par kibong dak tenük yoka mapa inyaker ta Lalu Yadav’er kibongi ashi. Ajisüaka, Nitish Kumar-i iba kuli jagidangbo meperir, anungji pa indang “zero-tolerance to corruption” policy nung ajemdaker Tejashwi Yadav-i sorkar nungi anentsüla ta metetdaktsü.
Tanü Lalu Yadav’er RJD telok senden ka amen aser idangji parnoki Tejashwi Yadav-i sorkar nung meden meyutsütsü aser ano Chief Minister-i yimjak nung kuli agüjang ta tuyubaji magizüker, ta telemtetba agia osang metetdaktsü.
“Ni Nitish den meteteper küm 40 tema arur, pa-a tai maketba nisung ka masü” ta RJD lennir tejen Shivanand Tiwari-i osangbener dang ashi.
Congress nung tekolak ketdangsertem- Sonia aser Rahul Gandhi natia Nitish Kumar aser Lalu Yadav na yongtsü nungi ia angatettepdaktsütsü merangogo saka tenati makok.
Bihar nung teloktep anenba ajanga 2019 küm Prime Minister Narendra Modi nokdangtsü atema party 18-i akümba opposition ka tentettsü mapa inyakba nung tetsükdaktsü tulu ajurutsü.
2015 küm Nitish Kumar aser Lalu Yadav nati mangatetteptem toktsür Bihar alliance tentetba aser iba nung Congress dendaktsüba inyakyim nung ajemdaker 2019 atema opposition teloktepji tentettsü asoshi mapa teinyakdak lir.