Meghalaya SSA tesayurtemi maternity leave agütsütsü asoshi akhang

Shillong, July 26 (Agencies): Meghalaya Sarva Shiksha Abhiyan Schools Association (MSSASA) tawa shidi ka nung Director of School Education and Literacy & State Project Director, Ambrose Ch Marak dangi Sarva Shiksha Abhiya (SSA) tesayurtem nem Maternity Benefit Act 1961 kübok Right to Payment of Maternity Benefit aser Maternity Benefit (Amendment) Act, 2017 kübok aliba ama Maternity Leave agütsütsü asoshi khanga züluogo.
Parnoki shidi nung ashiba agi, SSA amenokba mapang nungi tang tashi nung Meghalaya kübok SSA tesayurtem nem maternity leave agüja mali, koba state nung tanga tesayurtem nembo agütsütar. Shidi nung parnoki ano tetsür tesayurtem regular, temporary aser ad hoc bendangtsü asoshi tenüngdakba lemsatep. Maneni parnoki SSA kübok tetsür tesayurtem ajak bendanga mamshitsüla, ta ashi kechiyong ibaji India nunger temzüng kübok Article 14 anema lir.
SSA guideline kübok tesayur shilem 50 bo tetsür alitsüla ta shia aliba dak sendakba nung parnoki takhangba ka agütsü aser iba den külemi tetsür tesayurtem nem casual leave anogo 15 dang agütsür aser maternity leave dena magütsür koba tim masü, ta parnoki ashi.
MSSASA tiri item onoktem nenshia ashiba den külemi department dang ita na tsüngda nung parnok tangutsü tim temeden agütsütsü asoshi metetdaktsü.
Temetettsü kaji Meghalaya SSA tesayurtemi upper primary school tem nung tasembuba tesayur den kasa, pezübuba tesatyurtem nem itasen agütsütsü asoshi khanga arudar.