Dimapur Mission Higher Secondary School pur tsüraburtem anogo among

Dimapur, Aug.22 (TYO) : Honibar nü Dimapur Mission Higher Secondary School (DMHSS) nung azünger tsüraburtem anogo kanga junga mongogo.
Iba sentong ya Dimapur Ao Baptist Arogo (DABA) Town Fellowship tenla ki Khermahal nung agia liasü.
Iba sentong nung tsürabur, tesayur aser tanurtem den tepela aser tajungshi o ka jembidang, DABA sannüker Rev.N.Tzüdiri tsüraburtem dang kidang tanurtem den mapang agüja shisalemsateptsü aser parnok lesson bushiba mapa nung yariteptsü mepishia metetdaktsü.
Paisa tesayurtem danga tanurtem kanga junga anepalua sayutetba asoshi pelaba o ka ashidang, tesayurtemji tanurtem asoshi tanabuba tsüraburtem lir, anungji iba khuretji meteta kaketshirtem anepalutsü ajungshia liasü.
Rev.Tzüdirisa tanurtem dang peisasa azüoka tsürabur aser tesayurtem dang tashi angaa alitsü asoshi sayutsüngi olen kar ashi. ” Naji nai kechi bilemer, aji akümtsü, anungji takidak akaba senso tajung kaka akümtsü bilemang,” ta sannükerisa metetdaktsü.
Iba sentong tetenzüklen tarur ajak pelaa agizükba o School principal, Wb.Alemtushii metetdaktsü aser tesayur Imkonglai sarasadema sentong tenzük.
Iba sentong nung tanurtemi ken atenba, tsüngsangba aser jilushi aiba shilem tapu balala agiba ajanga tsürburtem kanga peladakja liasü.
Iba sentong nungsa tanurtemi “Judgement of Paris” aser “Prodigal son” indang jilushi aiba ajanga nisung ajak temoatsü ngua liasü.
Iba sentong nung tsüraburtem tenüng nung Wt.Ratonili Sukhalui jembi aser School Chaplain Wt.Merensolai sentong len ania liasü. Tatem nung Vice principal Wt.Madhui tarur aser shilem agirtem ajak dang pelaba metetdaktsü aser Arenla Temsü den sarasadema sentong atem.
DMHSS ya Dimapur Ao Baptist Arogoi lapokba school lir. Iba school nung azüngertem asoshi tebur hostel tajung lapoka lir.
Ano, iba school nung azünger tanurtem asoshi asentenshi sentong ka tan ita August 28 & 29 nung alitsü sentong renema lir.