JNU nung NE kaketshirtem atema Barak Hostel lung azüngogo

Dimapur, July 26 (TYO): July 24, 2017 nü Union Minister of State (I/C) DoNER & Chairman, NEC Dr. Jitendra Singh-i JNU nung Barak Hostel for North East students lung azünga yutsüogo, ta tanü DIPR sangdong ka nung metetdaktsü.
Iba hostel ya azüklen menden 5 tashi amentepa atuba ki asütsü aser student takdangtem dak alia, Hostel Offices, Dining Hall, Common Room aser tanga facility tem alitsü.
JNU-i hostel yangluba nung North Eastern Council, Ministry of DoNER-i yariba atema pelar, ta Vice Chancellor, Professor M. Jagadesh Kumar-i metetdaktsü.
“North East pur atema hostel balaka yangluba ajanga iba tesem nung tobur, sobaliba aser shisatsü tajung sabang tuluba nung sayutettsü” ta Dr Jitendra Singh-i lung azüngtsüdang ashi.
“India nung kanga dang renlokba tesemtem rongnung North East ya ka lir aser iba tesem nung growth rate ji 20% lir” ta paisa shisem.
Iba sentong nung DoNER Secretary, Naveen Verma aser NEC Secretary, Ram Muivah napronglai tekaratiba nung hostel yanglutsü ta tenangzükba metetdaktsü.
Sentong nungsa North Eastern Region nungi Members of Parliament 5 tashi aden.