Kargil Diwas nung asür Captain Kenguruse nem tetushi agütsü

Kohima, July 26 (TYO): Tanü Kargil Vijay Diwas amungdang Nagaland nung sepaitemi linük kümzüka ayutsü atema raradang asür sepai 527 nem tetushi agütsü.
1999 Kargil War nung taküm bendanga agütsürtem bilemteta Inspector General Assam Rifles (North), Major General Sanjay Gupta, 9 Assam Rifles nungi ketdangsertem aser jawan temi asür Captain Neikezhakuo Kenguruse, MVC (Posthumous) indang nüngshilung nung narojung yuja tetushi agütsü.
Asür Captain Kenguruse ji Nagaland nung tasütait jabaso ka lir aser pa ajanga armed forces nung züngsema alir ajak ajungmesor aser akasodaktsür, ta tanü IGAR (North), Major General Sanjay Gupta-i o jembidang ashi.
Asür Captain Kenguruse-i tsükchir indang machine gun post anema commando mission inyaktsü mulungtet aser pai kanga dang tasü itta lungren nung tsükchirtem den rara. Pai Indian Army indang yimya dang masü saka Nagaland aser nokinketertem yimya ama inyak, ta paisa ashi.
Nagaland nung lanupututem ajungmesotsüla aser state o linük tejakleni aoba nung shilem agitsüla. Nagaland jabaso asür Captain Kenguruse tsüngsü sülen anidaktsüla aser loktiliba, state aser linük renlokdaktsütsü atema shilem tajung agitsüla, ta ICAR (North)-isa ayongzük.
Nerhema yimer Captain Neikezhakuo Kenguruse ji July 15, 1974 nü aso. Pa St Xavier School, Jalukie nung azüng aser Kohima Science College nungi graduate asü. Iba sülen pai 1994 nungi 1997 tashi Government High School, Kohima nung tesayur inyak aser December 12, 1998 nü pa Indian Army nung commission asü.
Kargil War mapang June 28, 1999 nü pai tsükchirtem jenoka aliba tesep ka amakdang, pa taküm bendanga agütsü. Iba mapang pai tsükchirtem indang bunker ka makdok aser tsüchir pezü khaset. Asür Kenguruse nem Mahavir Chakra agütsüogo.
Tanü Headquarter 5 Sector Assam Rifles aser IGAR (N) kübok 9 Assam Rifles-i naro yuja tetushi agütsüba sentongji agi aser iba sentong nung asür Captain Kenguruse’er kinungertem, ex-servicemen, yimertem, SP Kohima Joseph Hesso, Commandant 9th IR Battalion Rothihu Tetseo aser tawa tasen shimba Parliamentary Secretary Dr Neiphrezo Keditsu nungertem aden.