NSF-i Naga yimten tebilemtsü aser kaketshirtem atema inyaktsü

July 26, 2017 nü Kohima nung NSF tir Kesosul Christopher Ltu-i anir mendenpur tasentemi osangbener senden ka nung o jembidang agiba noksa angur.

Kohima, July 26 (TYO): Naga Students’ Federation (NSF)-i Indo-Naga yimten tebilemtsü asoshi telemtetba ka agiba nung yariteptsü aser maneni kaketshirtem ajungkettsü atema tajungtiba agüja mapa inyaktsü ta nangzükogo.
Taoba ita Tir, Kesosul Christopher Ltu lenisüba kübok NSF ketdangpur tasentemi mapa melenzüka liasü aser tanü parnoki osangbener senden ka nung jembidang, “NSF-i maneni Naga nunger taginüba aser temeten atema nokdaktsü aser yimten tebilemtsü asoshi ajaki mulungba telemtetba ka agiba nung yariteptsü,” ta nenshia metetdaktsü.
Tawa Naga Peace Talks atema Interlocutor, R N Ravi-i Kohima semdangdang NSF-i tatembang telemtetba ka agiba nung Naga telok ajak dendaktsütsüla ta ashi, ta Ltu-i tanü osangbener dang ashi.
Centre aser NSCN(IM) tsüngda Cease Fire Agreement nung sign sütepba sülen küm 20 ajunger aser ano Framework Agreement nung sign asüba sülen küm ana süir aser iba asoshi süoki ia bilemer, anungji NSF-i telok anaprong dang yimjung olemtep dak sendakba maparen tekaraba nung inyaktsü ayongzüker, ta Ltu-isa metetdaktsü.
Kaketshir tentet ka ama, NSF-i Nagaland nung human resources development indang department dak temulung agüja mapa inyaktsü aser iba nung School Education, Higher & Technical Education aser Nagaland University dena lir, ta paisa shisem.
NSF-i sorkar school tem nung tesayurtem lemzüktsüba maparen nung temulung agütsütsü. Sorkar tesayurtemji tatidang agia shimer saka tajungtibatem shimyonga, parnoki nija school tesayurtem memeneper, ta NSF tirisa sasa bilemba olen ka ashi.
Iba onük asoshi, NSF-i tamakok anguba sorkar school aser tesayurtem dak ozüng tapet agi mapa inyaktsü aser ano sorkar school o tesayurtem tajungba kümdaktsütsü atema physical verification aotsü, ta paisa metetdaktsü.
“Centre-i teyari agütsüba scheme tem timi inyaker asü masü onoki mita aotsü aser iba nung free text books, uniforms aser Mid Day Meals dena lir” ta Ltu-isa shisem.
“Naga kaketshirtemi tanga state nungi kaketshirtem den tokteptsü atema Higher Education Department ajanga marks agütsür, saka department indang marking system kanga tasak asüba agi Naga kaketshirtemi state adena orr reju tajungtem nung admission mangur. Onoki marks talila agüjang ta akhangerba masü, saka kaketshir tajungtem nembo marks tajung agütsütsüla” ta paisa metetdaktsü.
NSF-i National Information of Technology (NIT) Chumukedima atema khuret süa abener aser iba ya IT institute asü masü ta ratar. Technical Education Department kübok technical course tem atema menden lemzüktsübaji Naga kaketshirtem dang asütsüla,
NSF-isa Nagaland University nung facility aser infrastructure tajungba kümdaktsütsü atema bilemer, ta Ltu-isa ashi.
NSF-i züngsem asemi akümba Education Committee ka tentetogo aser iba luden ajanga human resource development aser students’ welfare atema inyaktsü, ta tanü osangbener senden nungsa metetdaktsü.
HRD dak sendakba onük mesüra tebilemba kar lira, NSF Secretary Education & Convenor Müphato Nyuthe den 8974172206/8794646247 ajanga tongteprateptsü akok.
Sorkar department tem nug backdoor appointment atema NSF-isa ashiba agi, “June 6, 2016 nü Personnel and Administrative Reforms Department-i office memorandum agütsüba sülen shimokba nübo ajak anendaktsütsü takhangba nung masetshii nokdaker.”
Yaküm NSF-i department 10 mita ogo aser maneni mendenpur tasentemi tanga sorkar department tem mita aotsü, ta parnokisa ashi.
NSF-isa Inner Line Permit (ILP) atema jembidang, sorkari Bengal Eastern Frontier Regulation Act mapa küma meinyaker aser iba atema sasa bilemer, ta metetdaktsü.
“ILP ji mapang telatetba ka atema agütsütsüla aser ibaji yimya agi anogo 15 atema agütsür. ILP agütsüba aser state nung bendangertem aruba mita reprangtsü atema ILP regulation committee ka alitsüla. ILP indang maparenji Dimapur nungi tenzüktsüla aser local nisungtemji ILP holders nisung 2 atema dang guarantor südaktsütsüla” ta NSF mendenpurtemisa metetdaktsü.
Nagaland-i Illegal Immigrants aika aruba atema khuret abener aser ILP malirtem aser Illegal Immigrants tem ozüng tapet agi merenshitsüla. Maneni Federating Unit temi pei pei District Administration den yaritepa ILP jangjaba mapa inyaktsüla ta NSF mendenpurtemisa metetdaktsü.
Nagaland nung gari lenmang majungbaji tsüngsang-mopung aser ali majungba ajanga lir ta asüba kuliji agizüker, saka sorkari mapang shia nüngdakba mapa inyaktsüla aser anepalutsü tim, ta NSF-i ashi.
NSF-isa Public Grievance Cell tanaben lapokogo aser Public Grievances box ji NSF office kima nung ayutsü. Kaketshirtemi iba box nung mesüra Assistant General Secretary & Convenor Boketo Kiho den 8729993559/7005403835 tongteprateptsü akok.