CRPF 78 buba Foundation/Raising Day amung

Dimapur, July 27 (TYO): Zubza, Kohima nung aliba 78 Bn CRPF-i Brihostibarnü 78 buba Foundation/Raising Day ayongzüka mungogo.
Foundation Day tenüng nung Unit Commandant, Neeraj Yadav lenisüa kübok Zubza camp nung sentong balala ayonga agi.
Benjungmung linük tenzükba mapa inyakdang taküm bendanga agütsür sepaitem nem tetushi agütsü aser Unit Hq nung yanglua aliba Jai Jawan Memorial nung naro yutsü aser iba sülen Guard of Honour agi aser Unit Quarter Guard nung CRPF Flag atsüket.
British nunger yimsüsüba mapang July 27, 1939 nü iba force ya Neemuch, Madhya Pradesh nung tentet aser idangji “Crown Representative Police” ta aja, ta Commandant Neeraj Yadav-i tanü o jembidang ashi.
India nüjiso anguba sülen mezüngbuba Home minister, Sardar Vallaba Bhai Patel-i Crown Representative Police nüngdakba ajitet aser iba jagi pai British force ya manendaktsütsü telemtetba agi, ta Commandant-isa metetdaktsü.
Iba jagi pai Crown Representative’s Police nungi Central Reserve Police Force ta tenüng melen aser India linük nung Armed Force ka asütsü telemtetba agi, ta paisa ashi.
Tanü alima nung CRPF ta Para Military force tulutiba lir aser linük kübok tesem balala nung CRPF tem mapa lemzükja inyaker. CRPF-isa rara adokba linüktem nung UN peace keeping force ama sepaitem yoker.
Tanü anogomung nung Inter-Company Badminton, Jawan tem atema Debate tetoktepba aser tanurtem atema painting tetoktepba ayongzüka agi aser takoker nem sempet agütsü.
Nikongdang sub units, out posts aser Unit Head Quarter atema ‘Bara Khana’ ka ayongzüka chiyungtep.