Anogo asemnü International Children’s Film Festival tenzükogo

Dimapur, July 27 (TYO): Anogo asemnü ‘The Golden Elephant’ ta ajaba International Children’s Film Festival tanü nungi tenzükogo.
Iba benjung ya Children’s Film Society of India (CFSI)-i Nagaland Board of School Education (NBSE) aser Nagaland Baptist Church Council (NBCC) na den yaritepa ayongzüker.
Tanü nungi tenzüker July 29, 2017 tashi iba benjung ya Regional Centre of Excellence for Music and Performing Arts (RCEMPA), Jotsoma nung amungtsü.
Nagaland nung tang mezüng atema Children’s Film Festival ayongzükba atema kanga pelar aser iba ya maongka tulu ka lir, ta tanü NBSE Chairman, Asano Sekhose-i tesentepertem pela agizükdang ashi.
Iba benjung ajanga tanurtemi tangar indang sobaliba angazüktsü aser akhümtsübutsü, ta laisa shisem.
“Lanuwa mapang ya talenba ajak toktsür angazükba mapang ka lir. Nisung kati mangatetra, pa/lai tarendakba toktsütsüla aser mangatetbatem angatettsü merangtsüla. Naga loktiliba nung otsü ashiba ya yimya ka ama lir aser iba ma benjung nung lanurtemi marentaki dang pei maitsü sayutsüla” ta Music Task Force, Nagaland Project Director, Gugs Chishi-ia o jembidang ashi.
Tanü benjung lapokba sentong nung mendenji Mechuni W. Iralu liasü, Calvary Church, Jotsoma, Pastor Rev. Kelhuseto Nagi-i temoatsü meshia sarasadem, Neingusalie Yano-i ken ka aten aser Benreu Students Union, Kohima-i yartsüngsang ka ai.