Dr. Shurhozelie aser Kekhrie nati nübo ayimba sentong temogo

Kohima, July 27 (TYO): Kohima district kübok 10-Northern Angami-I Assembly Constituency by-election indang nüboyimba sentong tanü nikongdang 4:00 ako nung tembangogo.
July 29, 2017 nü by-election agitsü aliba nung regional lennir tejen aser taoba Chief Minister Dr Shurhozelie Liezietsu-i NPF ticket nungi aser educationist nungi politician akümba Kekhrie Yhome-i Independent candidate ama tokteptsü.
May 24, 2017 nü MLA Khriehu Liezietsu-i tebu Dr Shurhozelie State Assembly nung züngsem ka akümtsü atema lenmang lapokja MLA menden toktsüba sülen by-election ya agitsüsa aküm.
Iba by-election nung voters 16,235 (tebur 7697 & tetsür 8538)-i polling station 25 nung vote agütsütsü, ta tanü nikongdang Chief Electoral Officer, Abhijit Sinha-i osangbener dang ashi.
Vote agütsüba maparenji anepdang 7:00 ako nungi tenzüktsü aser nikongdang 4:00 ako nung tembangtsü. Iba sülen August 3, 2017 anepdang 8:00 ako nungi Kohima Deputy Commissioner indang office nung vote azüngtsü, ta paisa shisem.
By-election atema Electronic Voting Machines (EVMs) ajak renemogo aser tang mezüng atema Verifiable Paper Audit Trail (VVPAT) Machine amshitsü, ta CEO-isa metetdaktsü.
By-election atema Central Armed Police Forces company 3 mapa lemzüktsütsü aser election maparen metangoka ayutsü atema photographer, videographer aser web camera amshitsü, ta paisa shisem.
Election Department-i SVEEP campaign kübok clean election maparen inyakogo aser iba nung NGOs aser Nagaland Baptist Church Council-i teyari tulu agüja nungitogo, ta Additional CEO, N. Moa Aier-ia metetdaktsü.
Külen, Kohima Deputy Commissioner aser by-election atema Returning Officer, Rajesh Soundararajan-ia “by-election timi agitsü atema administration-i maparen ajak renemogo” ta ashi.
EVMs aser VVPAT amshitsü indang awareness campaigns agiogo aser persons with disability-ia vote agütsütsü atema facility tem renemogo, ta paisa shisem.
Senior Superintendent of Police Kohima, Joseph Hesso-ia security dak sendakba osang metetdaktsüdang, tensa junga dang lir saka vote agütsürtem temulung uludaktsütsü aser tetsübu kecha melii vote agütsüdaktsütsü atema police-i mita repranger aser mobile check post tem lapokogo, ta ashi.
By-election atema polling station tem nung central paramilitary forces-i telung nung aser Indian Reserve battalion-i tema nung mita anüktsü. Polling station 25 rongnung 17 ji ‘critical’ aser 8 ji ‘normal’ ta ajitetogo aser iba dak sendakba nung security forces mapa lemzüktsütsü, ta Joseph Hesso-isa metetdaktsü.