Nagaland nung community conserved areas (CCAs) tesemtem sema jajar

Mokokchung, July 28 (TYO): Longsa aser Ungma yimnasangeri alima tzü mopung, arem min aser shirurutem wazüka ayutsü nükjidong nung tentetba Tzüla (Dikhu) Green Zone Project Management Committee den tangalen nungi sorkar ketdangsür telok ka arua yangi Hotel Whispering Winds Mokokchung nung sensaksem ka liogo.
Tangalen nungi arurtemji; Germany nunger Dr. Guido Kuchelmeister, New Delhi nungi Dr. S.K Barik, Nagaland Chief Conservator of Forests (CCF) Wb. Supongnükshi IFS, NEPED nungi Dr. V. Rusta aser NEPED nungisa Wb. K. Kath nungertem liasü. Par telok yagi TGZPMC den alima tzü mopung wazüka ayuba dak sentakba nung shisa lemsatepa liasü. Item telok yagi Nagaland nung community conserved areas (CCAs) tesemtem ajak sema jajar.
Iba sentong nung German Bank-i anepalu yokba Dr. Guido Kuchelmeister-i mapang tatsüka agidang, Nagaland ya alima tzü mopung merüka aliba tesem tajung rongnung ka lir, ta ashi. Aji oda, yim anati iba ama community conserved area (CCA) tenzüka alima tzü mopung kümzüka aser wazüka ayuba maparen inyakba asoshi pelaba ka lemsatep.
“Nenoki inyakba mapa nungji tajungba kümdaktsütsü, nungita yaritsü, shisalen sayutsü aser teyari balala agütsütsü mulunga lir”, ta paisa shiogo.
“Koba mapa südir süaka, tenzüktsübo temela saka tarutsü nung ibaji metitemi bener aotsübaji tasak lir, anungji, iba mapa ya meremsepi bener aotsü asoshi arok khuret süa mera balala agitsüla”, ta paisa ayongzüka ashi.
Kasa sentong nung Delhi nungi arur Dr. S.K Barik-i jembidang, Longsa-Ungma lushi nung dang masü, saka TGZPMC ajanga tugua aliba (upstream pur) Sumi yimtem nem alima tzü mopung aser arem shiruru wazüka ayutsü shisatsü agüja maparen tenzükdaktsüba jangratemtsüka lir, ta ashi.
Sentong nung NEPED ketdangsür, CCF Supong IFS, Longsa Village Council chairman Wb. Pongenmeren aser Ungma Village Council Chairman Wb. Alemtoshi, TGZPMC chairman Wb. Tia Lkr aser tangatemia tebilemba aser inyakdaktsünüba shisatsü balala lemsatepa liasü.
Tzüla Green Project ya 6th April, 2010 nü tenzük aser taküm agi joko küm ti (8) buba arur. Longsa aser Ungma village council kübok TGZPMC-i alima tzü mopung kümzüka aser wazüka ayuba maparen balala inyaker.