Amoklushi awatsüng nung angoh mesüba tetoktepba akar; (Chubatemjen-i angoh tulutiba mesütet)

Chuchuyimpang, July 28 (TYO): Anglers Association Mokokchung-i ayongzüka yangi Amoklushi Awatsüng Chuchuyimpang yimdak mezüngbuba ‘AAM Open Angling Competition’ ta sür angoh mesü tetoktepba sentong ka kadaki.
Iba sentong nung Nagaland kübok district balala den ano Assam nungi dena arua shilem agidaki. Tanü nija angoh mesüba tetoktepba nung nisung noklangkati shilem agia liasü. Item tetokteper noklang ka rongnung Chubatemjen-i mezüng jenjang nguteta senpet sen 50,000/- agizükogo. Pai mesütetba angohji seret 1.195 kg liasü.
Tanabuba jenjang nung Imlirenba liasü aser pai mesütetba angohji seret 1.15 kg liasü aser paia senpet 30,000/- agizükogo. Tasembuba jenjang nung R.Lima liasü aser pai angoh 920 gm mesüteta senpet sen 20,000/- agizüka liasü.
Pezübuba jenjang nung Imtiwapang, pungububa nung Akümtemjen, trokbuba nung Litengho, tenetbuba nung Anguminba, tibuba nung Temsüsoba, tokububa nung Sendongyanger aser terbuba jenjang nung Arenla Sempo nungertem liasü.
Takoker ajak nem tayongeri angoh mesüba osettsüset tapu balala ajanga senpetja liasü. Tanü nija tetoktepba nung mezüng angoh mesütetsangji Imtiwapang liasü aser pa nem District Anglers Association Wokha-i surprised gift sen 3000/- agütsü.
Iba sentong ya Department of Fisheries, PHED Mokokchung Division, Village Council Chuchuyimpang den yaritepa Anglers Association Mokokchung-i ayongzükba lir.
Tanü iba senpet agütsüba sentong nung Parliamentary Secretary Merentoshi R Jamir tongti tesemdanger jaoka liasü saka pa mepaidoktetba yimden maparen kar ajanga marutet, saka pa melena Mokokchung Deputy Commissioner Sushil Kumar Patel IAS meyonger ka ama arua sentong merakettsüogo.
Iba sentong nung Mokokchung D.C Sushil Kumar Patel IAS den Chuchuyimpang Village Council Chairman Imnazülu, Nagaland Fisheries Director Kevisa Kense, Anglers Association of Nagaland tir Phukato Sumi aser AAM tir Toshikaba nungertemi tepela o den tayongzükba o balala jembia liasü.
Julu 29 nü telok tetok tetoktepba (team event) alitsü aser iba tetoktepbaji anepdang 7:00 ako nungi nikong 4:00 ako tashi akar. Amoklushi awatsüng ya Fazl Ali College anasa dang lir. Iba awatsüng temeket nungji süngo tatsük talem den chiyungtsü tapu balala ayokba hotel aser dokantem peria lir.