NPCC-i by-election anema SLP benokba SC-i agizükogo

Kohima, July 28 (TYO): 10-Northern Angami-I Assembly Constituency indang by-election agitsü ghonda ishika dang lia, tanü Supreme Court-i Election Commission of India dang by-election indang result ji okadaki obendang agütsüba kübok aitsü ta metetdaktsüogo.
Nagaland Pradesh Congress Committee (NPCC)-i 10-Northern Angami-I Assembly Constituency by-election atema Special Leave Petition (SLP) benokba nung ajemdaker Supreme Court-i iba osang metetdaktsü.
By-election agibaji Representations of the Peoples Act, 1951 nung Arrla 255 kübok lateta aliba anema lir ta NPCC-i Supreme Court nung SLP benok, ta tanü NPCC Media Cell-i sangdong ka nung ashi.
Act nung Arrla 147, Arrla 149, Arrla 150 aser Arrla 151 nung by-election ji menden tazüng akümba sülen ita trok tsüngda agitsüla ta shia lir. Ajisüaka, züngsem indang kümsükji küm ka majungdang lira, mesüra Election Commission-i Central Government den by-election asüngdangtepa by-election agitsü tasak ta lemtetra, iba Arrla nung alibatem kecha mamshitsü ta shia lir, ta NPCC Media Cell-isa metetdaktsü.
Kohima district kübok Northern Angami-I menden nungi taoba MLA Khriehu Liezietsu-i May 24, 2017 nü tebu Dr Shurhozelie MLA akümtsü lenmang lapokja menden toktsüba sülen iba menden tazüng aküm.
July 29, 2017 anepdang 7:00 ako nungi nikongdang 4:00 ako tashi by-election agitsü aser August 3 anepdang 8:00 ako nungi Kohima Deputy Commissioner indang office nung iba by-election indang votes azüngtsü.