Ungma nung Tsüngremmung benjong den sobaliba sayu sentong liasü

Sobaliba sayu tetoktepba nung telok kati shilem agidang tangokba noksa nung angur. Ungma, August 1st, 2017.

Ungma, August 1 (TYO): Longtrok Senden Ungma-i ayongzüka tsüngremmung benjong den repsema 32 buba sobaliba sayu tetoktepba sentong ka Mungulbar aonung Ungma yimdak Babu Tzübo Amphitheatre nungto liogo. Iba tetoktepba nung Ungma yim kübok tenteta aliba club 10-i shilem agi.
Iba sentong nung tongti o jembir Wb. Dr. T. Lima Jamiri jembidang, club kati sobaliba kentenmenü aser yar tsüngsang kisüng masü saka lokti aser yim asoshi teinyaktsü wadang aika lir, ta asen jakdang teinyaktsü kar lemsatepa liasü.
“Sobalibaji asen ayak lir aser lanu asensortemji lokti asoshi tarutsü nükla lir, anungji, tsüraburtemi lanurtemji sobaliba nung timi anitettsüla”, ta paisa ayongzüka ashi.
Tanü anüdoklen sobaliba aser media balala ajanga lanurtem aika mejungi kongshia, tanü kidang kibong nung talisa jila nung alirtemi pei tetsü oshi mejembiteti pi oshi nung dang jembiteper, anungji, tsüraburi pei chirnurtem kinü asüdang nungi kanga junga sayutettsüla, aji mesüra liyonga aodang tetsükdaktsü aika ajurutsü, ta tongti o jembirisa tekümdangtsü o kar ashi.
Korea aser Japan nungeri par sobaliba aser oshi kanga metsünga reta agir aser sobaliba dak sentakba maparen balala wazüka aser kümzüka ayutsü meranger, yamaji, lanurtemi pei sobaliba akangakanga amettsü asoshi paisa tatishitsü bener arua ashi.
Sentong nung United Soyim Club Ungma den Longtrok Senden Ungma aser tangartemi yar tsüngsang aser sobaliba kensü balala ajanga shilem agidang tesentepertem kanga pelatepa liasü. Sentong nung yimsüsür Wb. Rarenbenba Tatar-i Tsüngremmung ratet ashiba den tayongzükba o tulu bener arua tesentepertem ayongzük.
Iba tetoktepba nung tedendangertemji; Wb. Rarenbenba Tatar, Wb. Nungsangmeren Tatar aser Wb. Imdangmeren Jamir par asem liasü.