Odisha nung tsüngi agi nisung 34 aiset

Bhubaneswar, August 01 (Agencies): Odisha nung tesüiba ghonda 36 tsüngda tsüngi agi nisung 34 aisetogo.
Kümshia Odisha nung nisung 325 shi tsüngi agi asür, aser tesüiba küm pongu tsüngda state nung nisung 1,623 tashi tsüngi agi aisetogo, ta Special Relief Commissioner (SRC) office osang ka ajanga metetdaktsü.
Taküm küm tenzüker July 31 nü tashi nung nisung 140 tsüngi agi aisetogo aser yaküma tsüngi agi nisung 347 aiseta liasü. Iba denji kasa 2015 küm nisung 403, 2014 küm nisung 311 aser 2013 küm nisung 372 tsüngi agi aiseta liasü.
SRC nungi B P Sethi-i, “Tsüngi ama alima lendong balala nungi jenbua alitsü atema nüburtem nem rajema lidaktsütsü nüngdaker,” ta ashi.
Sethi-i ashiba agi, alu nung mapa inyakertem, Kendu tou apetertem aser Self Help Groups nung inyakertem timba iba lendong agi kongshir, anungji parnok nem iba indang rajema lidaktsütsü atema asalentong renemdar, ta metetdaktsü.
Sethi-isa, Odisha sorkari tsüngi ya state nung lendong temeja ka lir ta sangdongogo aser iba lendong ajanga asürtem nem senotsü teyari sen lakh 1.5 agüja aliba nungi sen lakh 4 tashi tutsüogo, ta metetdaktsü.
UNDP, OSDMA (Odisha State Disaster Management Authority) aser Department of Geography, Utkal University sentper renemba report ka ajanga ashiba agi, tsüngi agi Cuttack, Mayurbhanj aser Jajpur district tem tamajungba kongshir.
Iba sülen tanga district temji Ganjam, Kendrapara, Khurda, Dhenkanal, Balasore aser Bhadrak district tem lir.