GNLA telungpur ka khaset

Williamnagar, August 1 (Agencies): South Garo Hills kübok Gare Ringdi yimtsüng nung tanep East Garo Hills Police aser GNLA telungpur na khatepba nung GNLA pua ka khasetogo.
EGH SP, Vivekanand Singh-i ashiba agi, GNLA telungpur, Nit aser Adram na lenisüba kübok parnok trok tenet ka aliba osang tejangja ka angazükba sülen, EGH police-i Gare Ringdi yimtsüng (SGH) meita ao.
Osang ajangasa ashiba agi, iba meita aoba mapang police aser telungpurtem tsüngda mapang tatsüka atema khatep aser iba sülen mejangjaba tasümang ka khatepba tesem nungi ngutet.
Pistol ka den injang, GNLA demand note, GNLA seal tem, kaket, receipt kaket, gelatine sticks aser mobile phone 6 iba tesem nungi ngutet.
Kasa mapang nung police temi telungpurtem rongnungi ano ana yirur alitsü, ta temolung melemi bilemer. “Iba ya maneni GNLA aser Sohan D Shira telok atema kanga takoksa lir,’ ta Singh-i ashi.