Tripura nung BJP puri vote alir ta CPI-M-i aitsü

Agartala, August 1 (Agencies): Taruba küm election matong tsüngda BJP puri Tripur nung voter tem nem electronic gadget balala agütsür, ta CPI-M lenir kati aitsü, saka BJP puri iba osangji teyazü ta shiogo.
“Tripura nung Left party pur atsüngdaoktsü atema BJP puri tasa aika asadanga inyakdar. BJP puri electronic gadget tem; mobile aser computer nunger amala nüburtem nem agüja parnok vote alitsü asoshi meranger, ano ibaji dang masü parnoki two-wheelers dena agütsür,” ta Communist Party of India-Marxist Tripura State Secretary Bijan Dhar-i Hombar nikongtsütsü osangbenertem dang ashi.
July 30 aser 31 ta anogo ana state committee senden nung CPI-M pur New Delhi nung July 24 nungi 26 tashi central committee senden nung telemtetpa agiba tem lemtep. Iba senden nung ano taruba küm Tripura nung election dak sendakba nung sensaksema liasü.
Bharatiya Janata Party (BJP) puri CPI-M puri aitsüba nung telangzüba agüja ashiba agi, Tripura nung voter tem tangatet dang lir aser parnok alitsü asoshi tamakoktsü.
“Onoki shinga nema electronic gadget tem magütsür saka BJP nung inyaker tem nem maparen balala inyaktsü motorbike dang agütsür. Iba amala motorbike ya tanga state nunga party züngsemtem nem agütsür,” ta Tripura BJP otongdar Mrinal Kanti Deb-i ashi.
Tripura ya India nung CPI-M yimsüsüba kübok aliba state ana rongnung ka lir aser parnok sangküm February ita election agitsü.