AIADMK-i PM Modi-i aniba NDA teloktep nung adentsü

New Delhi, August 01 (Agencies): Bihar Chief Minister, Nitish Kumar-i Ato kilonser, Narendra Modi-i aniba National Democratic Alliance (NDA) sorkar nung adenba sülen anogo ishika lir AIADMK-ia NDA teloktep nung adentsü ta osang angazüker.
Osang angazükba agi, August 4, 2017 nü AIADMK party nung tongti lenirtem senden ka mena NDA nung adentsü atema telemtetba agitsü, aser tan ita mezüng hopta nungsa iba atema sangdong ka agütsütsü imlar.
Edappadi K. Palaniswami (EPS) sorkar nung tongti minister kati, “Tang tashi nungbo kecha mejangja. Onoki Hokolbarnü senden ka mena telemtetba agitsü. Onok nem iba temepishiba agutsüogo, ajisüaka party-i dang iba telemtetba agitsü,” ta metetdaktsü.
Tamil Nadu nung BJP indang vote shilem 2.5 dang lir.
Ano külen tanga osang ka ajanga angazükba agi, 2019 küm general election agitsü lia NDA tashi taitba akumtsü atema BJP-i AIADMK party NDA teloktep nung dendaktsütsü meranger.
1998-99 aser 2004-06 küm NDA teloktep nung dena aliba party, AIADMK ya BJP aser Congress Party na sülen Lok Sabha nung party tulutiba jenjang asembuba nung lir.
Osang angazükba agi, AIADMK NDA nung dendaktsütsü atema mesüzüktsü asoshi Ato kilonser, Narendra Modi aser BJP Tir, Amit Shah nati BJP nung tongti lenir ka nem mapa lemzüktsüogo.