Kuli kaket tejangja makar anema tapet jenjang agitsü:Manipur CM

Imphal, August 1 (Agencies): Kuli kaket tejangja makai bendang lima nungi state-i arurtem dak sendakba nung ken o sorkari kanga kümdanga asadangdar, ta Manipur Chief Minister N. Biren Singh-i tang tagidak 11buba Manipur Legislative Assembly Budget Session nung ashi.
State nung ozüng alema kuli kaket tejangja makai arua alirtem dak sendakba nung aser tawa kaketshirtemi longkak aitba dak sendakba nung sorkari jenjang koda agidar, ta MLA R.K. Imo-i asüngdangba nung telangzüba agüja Chief Minister Biren Singh-i ashiba agi, kuli kaket tejangja makai linüki aitertem dak sendakba nung sorkari Constitution nung koda shia lir aji tamasa reprangdangtsü. State nung iba amala nisungtem kwi aita alia agi bushisüngdangtsü, ta pai nangzük. Paisa ano iba ken o dak sendakba nung electoral roll reprangshia tesem tonga oa asadangtsü, ta ashi.
Iba bushisüngdang mapang kuli kaket tejangja makai state-i arua alirtem putetra idangjisa parnok meyipa yoktsü, ta pai shisem. Pai kaketshir tentet dang Assembly Constituencies ti nung lisopurtem atema menden mekazüka yujang ta akhangba anentsü asoshi mepishi.