Police-i IPFT dak temolung melemi bilemer

Bodhjungnagar Industrial Area nung tetsür ka samaba sülen longkak aitba lokti-i police tem dak long agi anoba noksa nung angur. Iba tesem nung tensa azüoktsü atema police aser paramilitary force yoka lir.

Agartala, August 1 (Agencies): Lisopur tetsür ka pur aoba dak sendakba nung Mongolbarnü Bodhjungnagar anasa mangatettep adokba ken o nung Indigenous People’s Front of Tripura (IPFT) pur sendaktepa alitsü ta police temi temolung melemi bilemer.
Police osang ka ajanga ashiba agi, iba lendong nung police 10 yirua liasü.
Television nung interview agiba mapang West Tripura Superintendent of Police Abhijit Saptarshi-i ashiba agi, iba lendong ya IPTF puri nungita adokdaktsü, kechiyong Bimal Debbarma linüsüba kübok IPFT züngsemtemi police station amak.
Yasüng nungi Bodhjungnagar nung IPFT pur aika adenshir liasü. Parnok idaki mepetmesü adokdaktsütsü asoshi aru. Osang ajanga ashiba agi, lisopur tetsür shiba pur ao la ya TSR jawan ka kinungtsü lir aser la yasüng tatemsa Bodhjungnagar nung motorcycle ka nung Rabindra Debbarma den mener oya angu. Rabindra-i pa Second Battalion TSR jawan ka ta ashi.
Dena oya alidang mejangjaba nisungtemi pa dak azük aser tetsürla pur ao. Tetsürlaer kinunger aser Rabindra Debbarma nungeri paonungjisa Bodhjungnagar Police Station nung ken o ka benok.
Yasüng nungi IPFT pur aika, item nisungtem aputsü asoshi khanga sentepa lir aser parnoki tanep police station maka raksatsüba den külemi polic tem dena amak.
Osang angazükba sülen Additional Superintendent of Police Sharmishta Chakraborty-i anir police aika tensa azüoktsü asoshi iba tesemi ao. Tensa kanga mejungi akümba ajanga police temi longkak aitertem dang ajok agi azük aser tear gas dena khaloktsü.
Longkak aitertemi industry kar den TSR meyong canteen ka dena raksatsü. Iba tesem nung Section 144 benokogo.
Iba ken o dak sendakba nung IPFT tekolakba NC Debbarma-i ashiba agi, Bimal Debbarma ya parnok party züngsem masü aser par telok iba tatalokba nung densema mali.
“Iba ya yimden yimsüsüba dak sendakba tatalokba ka masü. Police tem tetsürla pur aoertem aputsüba nung dang temolung agütsütsüla. Ozü telok nungi iba tatalokba nung shilem agiba osang ni kecha angazüka mali,” ta Debbarma-i ashi.