Kohima Bible College küm 47 jungogo

Kohima, August 1 (TYO): Kohima Bible College (KBC) lapoker küm 47 buba ajungba den külemi Alumni Meet 2017 amung.
KBC ya 1970 küm lapok aser iba bible college ya Nagaland nung mezüngbuba aser North East nung tanabuba lir.
CRC North East India nung mission director, Rev. Neivotso Neikha-i o jembidang, August 1, 1970 nung taoba chief minister asür Hokishe Sema-i college lapoktsüba bilemtetba lemsatep.
Rev. Neivotso ya KBC nung azünger mezüngbuba batch nungi lir aser pai alumni pur dang “asenoki longjemra, tesüngmangtsü aser mapa tulutem ataloktsü” ta tayongzükba agütsü.
ACRCC executive secretary, Rev. Dr. DL Sanchu-ia KBC tenzükba mapang yaritepba indang osang lemsatepdang, “Tejen putu süiogo. Taoba mapang onoki tayongzükba jenti ajurutsü, mission mapa inyaktsü nung lokti, yimten aser denomination tsütsü tetsükdaktsü aika ajurua liasü” ta metetdaktsü.
“Asenoki dangi putu tasen ka aruogo aser kishi tuluba lapokogo. Osang tajung mangshidangi alirtem dangi asenoki osang proktsüla aser Tsüngrem indang mission aser osang nübortem nem sangoktsütsüla” ta Dr. DL Sanchu-isa ashi.
Tanü-asüng technology ajanga asenoki sayutsüngiba mapa tajungba aser tuluba inyaktettsü aser asenoki inyakba mission mapa nung modern technology amshitsüla, ta paisa shisem.
Ano, International Restoration Church, Austin, Texas nung pastor, John Monger-ia 1996-2000 tashi KBC nung azüngba menungra bilemba olen ka lemsatepdang, “tanü ni nokdaka aliba ya KBC ajanga lir” ta ashi.
John Monger-isa alumni pur ajak dang teti tongtepratepa alitsü aser KBC tashi itdaktsütsü atema tayongzükba agütsü.
Tanü sentong nung KBC principal Rev. Zotuo Kiewhuo-i KBC vision 2020 lemsatepdang, “onoki quality adokdaktsünür, college küm 50 ajungtsü atema mapang tonga arudang onoki quality nung temulung agüja inyaktsü” ta metetdaktsü.
KBC nung azüngertem alima tesem balala nung prokshia lir aser parnok China, US, South Korea, Africa, Australia, European linüktem nung Tsüngrem tenzükba wadang nung lir, ta Rev. Zotuo-isa ashi.
Paisa alumni pur aser tangartem dang boy’s hostel project nung yariteptsü atema mepishia metetdaktsü.
Iba sentong nung mendenji KBC vice principal Pete Z. Krose liasü aser pai ashiba agi, “iba college nungi alumni tem tesem balala nung Tsüngtem tenzükba wadang nung inyakdar aser süngjang tajung tangdaktsüdar. Iba mapa tajung atema onoki Tsüngrem dang kanga pelar.”