Tayimtsü apusodak tesem nung tayimtsü ana tsüktep

Jakarta, August 03 (Agencies): Indonesia nung aliba Medan yimti nung tayimtsü anendak tesem nung Brehostibarnü nisung amenba tayimtsü ana tsüktep, ta airline indang odongtari ashi, aser iba ajanga linük nung tayimtsü ketdangsüba nung tashi maitba sayuogo.
Lion Air ajanga amshiba Boeing tayimtsü ya Sumatra asetkong nung aliba Kualanamu airport nung anener tanemi aoba mapang Aceh province nung aliba Meulaboh tesem-i aotsü ataa aliba Wings Air tayimtsü indang tashikang nung atsük.
Iba lendong nung nisung kata meyiru aser ketdangsertemi iba tatalokba indang bushisüngdang südagi.
Social media nung ngutetba noksa nung Lion Air tayimtsü indang tashikang abelen aser Wings Air tayimtsü indang tashikang achichi raksar angu aser iba tayimtsü anaprong ya Lion Group indang lir.
“Passenger ajak junga dang lir, shinga meyiru. Tayimtsü anaprong apron nung lir…” ta Lion Air indang odongtar, Andy Saladin-i ashi.
Indonesia nung tayimtsü indang industry renlokba den domestic passenger tem kanga renloka kümdagi, saka tayimtsü aser tayimtsü nung senzür kümzüka ayutsü asoshi inyaksangshi mejungi arudagi.
May 2016 nung Lion Air indang tayimtsü ana Jakarta nung aliba Soekarno-Hatta airport nung tsüktep aser April 2016 nunga Lion Grop indang Batik Air aser TransNusa tayimtsü tsüktep.
2013 küm Lion Air indang jet ka nung tayimtsü junga maniteter pilot ka mener apusoba mapang Bali nung aliba tzüyim nung tsükoka tayimtsü ya ana küma sadang. Iba lendong nung nisung kar yiru, saka nisung kata masü.
Sorkar indang ‘air navigation company, AirNav ajanga Jakarta nung ghonda shia tayimtsü 84 apusodaktsür aser anendaktsür, ta Indonesian air traffic controllers association ajanga ashi, aser iba ajanga lendong tali adokdaktsür.