Russia nem US-i sanction agütsüba ya ‘shishilemba rara’ lir: Medvedev

Moscow, August 03 (Agencies): Russia nem tenokdangba agütsütsü renemba ya shishilemba rara den sako lir, ta Russia Ato Kelonser, Dmitry Medvedev-i tanü ashi.
US tir, Donald Trump-i item tenokdangba nung sign asüba ajanga US tir tashi maitba aser Congress-i mezüngmeshiba maparen ka sayur, ta Medvedev-i ashi.
Russia-i 2016 US election nung shilem agi aser Ukraine nung mapa balala inyakba anema Russia nem temerenshi agütsütsü nükjidong nung iba temzüng ya US-i yanglu.
Congress-i iba temzüng asoshi meshisadangi telemtetba agi, ta Trump-i aitsür.
Countering America’s Adversaries Through Sanctions Act nung Trump-i Bodhbarnü sign asüdang, iba tenokdangba ya shidak masü, ta pai shisem.
Iba temzüng ajanga Russian energy project tem nung America nungeri sen indokba tajemba akümtsü aser iba ajanga US company temi Russia den shishilembatsü tasakba akümtsü.
Kasa temzüng ajanga Iran aser North Korea nem-a tenokdangba agüja lir.
Iba sanction tasenba ajanga linük ana tsüngta nuclear tsütsü tezüngzüktep aliba raksatsür aser tim yimya nung telangzüba agütsütsü, ta Iran-i ashir. Iba tenokdangba asoshi North Korea nungi osang kata arua mali.
Iba sanction ajanga US administration tasenba den tesendaktep tajungba yanglutsü teimla aliba tembangdaktsüogo, ta Medvedev-i pa indang Facebook page nung Bodhbarnü zülutsü.
“Iba sanction ya yimten yimsüsür temi agizüka renemogo aser iba ya tesüngmangtsü sayatenya ka madalokra putu aika alitsü. Aji süaka Russia indang rongsenketsüng maneni renloktsü,” ta Russia ato kelonser-i zülu.
US tir Trump, shiba dang Medvedev-i “non-systemic player” ta aja, pa menden nungi atsüngdoktsü asoshi US Congress-i sentong tasen yanglutsü, ta Medvedev-i tekümdangtsü ashi.
Moscow-i US tir indang election nung shilem magi, ta ashir, aser Congress-i iba bill agizükdang parnokia telangzüba agüja Russia nung aliba US embassy aser consulate nung inyaker staff ya 455 dang kümdakjang, ta US nem totuyuba agütsü, aser iba ajanga item embassy aser consulate nung nisung 755 agi tajemba kümdaktsür aser Moscow nung aliba US country house aser warehouse amshitsü memela.
US aser Russia tsüngta iba mangatettep adokba ajanga rongsenketsüng nung takoksa tulu ajurutsü, ta Germany densema Europe nung aliba linük temi tsübua bilemer, saka European Union-i linük ana indang tebilemtsü lemsatepba sülen iba bill ya tajemba kümdaktsüogo, ta European Commission tir, Jean-Claude Juncker-i ashi.
“Linük indang tembartem den jungjunga asüngdangyaba sülen US Congress-i iba tenokdangba ya agütsür. Aser asenok ya tang tashi US indang tembar asütsü ta ni imlar,” ta Juncker-i ashi.
US tir indang election nung Russia-i shilem agia Trump nem kokdaktsü, ta aija aliba ya kuli kicha maliba nung aitsüba lir, ta tir Trump-i ashir.
Taoba hopta iba bill Congress nung agizüka White House-i yokba ya linük temzüng nung ajemshir, ta Trump-i Congress aitsür.
“Tir ka ama ni Congress dang nungi tajungba nung tanga linük den tesendaktep yanglutettsü,” ta Donald Trump-i ashi.