Alima terenlok asoshi nüburtemi sorkar den yaritepa inyaktsüla: S.Chuba Lkr

Mokokchung, August 03 (TYO): Tanü Veterinary & Animal Husbandary, Parliamentary Secretary, S.Chuba Lkr-i Longkong Yim süngküm kanga dang meraketketa yanglua aliba semzüktsüogo.
Tanü iba sentong nung Longkong yimsüsür kinüngtsürtemi S. Chuba Lkr nem nüngyu ken ka tenoklotsü aser Longkong Aola Wb. Jongpongchiten-i pela agizükba den tayongzükba o jembia liasü.
Longkong yim süngküm junga yanglutetba ngua Parliamentary Secretary-i sorkari nüburtemi tejakleni anitsü asoshi terenlok mapa jenti dang inyaktsü meranger, saka nübürtemi sorkar nükjidongji mangateti junga meinyakra maparen aika takok monguteter, aser ibaji ajanga sorkar nükjidongji metongtettsü aser metongteter saka Longkong yimtakbo Longkong nunger yimsüsür aser nüburtemi tangatetba tajung nung yim süngküm tajungtiba nung yanglutetba asoshi pelar, ta ashi.
Parliamentary Secretary S.Chuba Lkr-isa T.R.Zeliang lenisüba nung pa Chief Minister ser Nagaland sorkar anir odagi, anungji nüburtemi Naga lima tejakleni aotsü tangatetba nung sorkar den teka amtepa alitsüla ta ashi.
Kong sorkar lir yangji party lir, anungji tzü nung ango ali ama sorkar den party alitsü tim, ta paisa shisem.
Longkong yimtak iba sentong temer külen Parliamentary Secretary S.Chuba Lkr-isa Phangsang nung Veterinary Department kübok Veterinary Sub-Centre aliba Veterinary Dispensary ajungkettsüba sentong agia liasü aser iba ajungkettsüba den külemi iba Dispensary nungsa Doctor ka anioktsüba sentonga agia liasü.
Phangsang nung Veterinary Dispensary ajungkettsüba sentong nung mapang tatsüka agia jembidang nüburtemi sorkar dak dang nendaker malitsüla, saka pei sasa akokba tashibo meranga inyaktsüla. Shiruruji nisung meimchirtem asoshi rongsenren nung tongtipangtiba lenmang rongnung ka lir, anungji linük nung rongsenkettsüng ajungkettsü asoshi nüburtemi shiruru metsüba nung temelung agutsütsüla, ta Veterinary & Animal Husbandary, Parliamentary Secretary-i adenshia aliba nüburtem ayongzüka ashi.
Shiruru tapu balalaji nisung meimchir den kasa dang lir anungji aiben tashitak tapu balalaji shiruru dak nungi menar anungji item timtem nung jenbua alitsü asoshi Veterinary Dispensary ka lapoktetbaji nüburtem asoshi tajangzük tulu ta angateta nüburtemi department den teka amteper inyaktsü tim ta S.Chuba–isa nüburtem ajunshia ashi.
Tanu item sentong ana temer kelen ano Phangsang nungsa Veterinary & Animal Husbandary, Parliamentary Secretary S.Chuba Lkr-i Government High School Phangsang school ki tasenba lapoktsüba sentong ka agia liasü.