Dr. Liezietsu-i bye-election nung takok angu

Kohima, August 03 (TYO): Taoba Nagaland Chief Minister aser Naga People’s Front (NPF)-i shimba candidate, Dr. Shurhozelie-i 10 Northern Angami-I Assembly Constituency bye election nung takok nguogo.
Bye election ya July 29, 2017 nü agia liasü aser tanü, Brihostibarnü Office of Deputy Commissioner & District Returning Officer nung vote zünga liasü.
Dr. Liezietsu-i Independent Candidate, Kekhrie Yhome madak vote tali 3470 agi takok angu.
Vote ajak agi 12,728 agutsü aser iba nungjagi Dr Liezietsu-i vote 8026 aser Yhome-i vote 4558 ngua liasü, ano vote 72 bo NOTA liasü.
Maneni postal service ballot 23 nungi Dr Liezietsu-i vote 12 angu, Yhome-i 10 aser vote kabo magila liasü.
Iba constituency kübok polling station 25 nungi polling station 24 nung Dr Liezietsu jenjang tajungba liasü aser Lower L Khel-II polling station nungbo Yhome-i vote 123 tali angu.
Dr Liezietsu-i yimtenren nung ajemokba sülen tang agi tekubenbuba pai takok nguogo. Tamalen pai 1969, 1974, 1977, 1982, 1987, 1993, 2003 aser 2008 kümtem nung election nung takok ngua liasü. Ajisüaka 1989 küm State general election aser 1999 küm Lok Sabha election nungbo pai tamakok ngua liasü.
Tanü election osang sangdongba sülen Kohima Deputy Commissioner aser Returning Officer, Rajesh Soundararajan-i Dr Liezietsu nem takok anguba certificate agütsü.
Ano külen Dr. Liezietsu’er kidang tenüngsang agütsüba sentong ka agidang pai, “Iba ya kü kijai takok anguba ka masü saka Party aser Naga nungeri takok anguba ka lir,” ta metetdaktsü.
Paisa, par jabaso Khriehu-i May 24, 2017 nü pa nem pa menden azüngtettsüba atema pelaba metetdaktsüba den külemi Party nung inyakertem aser MLA tem dang pelaba lemsatep.
“Tang agiba bye election nung meranga inyakba aser telongjem ajanga, tang Party-i timtem ajuruba ya asenoki koktettsü ta temaitsü sayur,” ta paisa meterdaktsü.
“Iba ya tongbang tulu ka liasü, kechiyong Angh densema tongtibang lenirtem aser takartem-i tan election nung NPF anema inyak, anungji iba ya kü taküm nung takok tulu ka lir,” ta paisa metetdaktsü.
NPF Party tir, Dr Liezietsu-isa, taruba general election nung takok angutsü atema iba ya tajemdakdak mera ka asütsü, ta ashi.
Paisa, “Naga lokti nung tera junga yanga aliba party ji NPF dang lir. Congress mapang süiogo, BJP ya Naga nunger atema majung kümogo aser Democratic Peoples’ Party-i Election Commission nung register mesüteter, anungji state nüburtem atema lenmangji NPF dang lir,” ta metetdaktsü.
Dr. Liezietsu-isa MLA tem dang August 5, 2017 nü tashi nung chichiba Party-i meyipa arung, mesüra anentsütsü ta metetdaktsü.
Kasa sentong nung Rajya Sabha züngsem, K G Kenye, MLA tem- Kuzholuzo Azo Nienu, Y Vikheho Swu, P Longon, CL John aser Yitachu nungeria jembia liasü.
Iba sentong ya NPF Working President, Huska Yepthomi leniba nung agi aser Sumi Baptist Church Pastor, Dr. Hokheto Chophy-i sarasadema liasü.
NPF Working President, Apong Pongener-i tepela anküp o jembi aser NPF Phek division, Dziesekhrienuo Keretsu, Asin Shurhozelie, White Orchid aser NPF bandh teloktemi ken agi shilem agia liasü.