NPF-i MLA 36 anentsütsü atema benoktsü lemtetogo: Yitachu

Kohima, August 03 (TYO): Naga People’s Front (NPF)-i par MLA 36 anentsütsü atema benoktsü asoshi telemtetba agiogo.
Tanü Kohima nung osangbenertem den jembidang NPF MLA, Yitachu-i, “July 21 nü Assembly nung ‘vote of confidence’ mapang Assembly nung anenja aliba züngsem aser Chief Minister TR Zeliang anema chichiba party whip-i tuyuba alema inyakba asoshi parnok anema August 7 nü disqualification petition benoktsü onoki lemtetogo,” ta metetdaktsü.
10th Schedule ozüngtem nung ajemdaker State Assembly Speaker aser Supreme Court-i disqualification petition agizüktsü imlar ta shia Yitachu-isa, parnok anentsüba ajanga assembly nung züngsem ajema akumtsü, ta ashi.
Pai ashiba agi, tang 12buba NLA alitsü atema senden nung tanüngba züngsemtemji kanga ajemer asütsü, aser ibaji ajanga House anena state nung yakta election agitsüsa akümtsü.
Yitachu-isa, legislature party masü saka tim party-i whip agütsür, aser melung masüba MLA temji ‘ozüng alema inyakertem bail’ nung ama lir, kechiyong 10th Schedule kübok parnok anentsütsü, ta metetdaktsü.
Chief Minister TR Zeliang kübok NPF Legislature Party-i NPF Tir, Dr. Shurhozelie Liezietsu dang menden nungi alutsü akhanger, aser iba dak sendakba nung Yitachu-i, NPF temzüng apir, Tir ji Party anenba ajanga dang agientettsü akok mesüra pasasa dang anentsü akok, ta metetdaktsü.
Iba dak sendakba nung pai, MLA temi NPF Party interim president atema Lok Sabha MP aser taoba Chief Minister, Neiphiu Rio shimbaji ozüng alema lir, ta metetdaktsü.