Dimapur, Kohima nung gari lenmangtem yanglutsü CM-i tuyuogo

Kohima, August 03 (TYO): Nagaland nung NPF-i aniba DAN sorkar tasen akümba sülen hopta ka tsüngda Chief Minister, TR Zeliang-i nüburtem dak rangloker mapa balala inyaktsü atema tuyuogo.
Tanü Civil Secretariat nung Roads & bridges renovation Coordination Committee senden ka ayongzüka TR Zeliang-i sorkar aser Public sector naprong dang nüburtem taküm jenjang tajungba atema rangloker inyaktsü ayongzük.
Tanü iba senden nung, tanga onüktem toktsür tang rongdak süa apu aser gari lenmangtem yanglushitsü nüngdak ta jembi, aser iba mapang nung Zeliang-i National Highways, BRO, R&B, allied Departments aser Contractor tem dang tang nungi tenzüka Dimapur aser Kohima nung gari lenmangtem yanglutsü tuyu.
Gari lenmang aser aputem yanglushitsü dak sendakba nung, tang rongdak süa Dimapur nung Purana Bazar nungi 3rd mile tashi lenmang yanglushitsü, Green Park nungi Thahekhu tashi lenmang yanglushitsü, Golaghat junction nungi Tragopan junction aser DC Court, Dimapur tashi lenmang yanglushitsü, Railway Station flyover nungi Supermarket tashi, Full Nagarjan nungi 3rd mile tashi aser Tragopan junction nungi Burma Camp traffic point tashi gari lenmang yanglushitsü lemtet.
Iba dak alia Purana Bazar nung kilentzü aodak merüktettsü, aser iba mapaji Commandant BRO-i August 5-7, 2017 anogotem nung inyaktsü.
Dimapur nung item mapatem ya August 4 nungi August 9, 2017 nü tashi nung inyaktsü.
Iba dak alia Dimapur nung aputem yanglushitsü telemtetba agiogo: 4th Mile aser Nagarjan nung Suspension apu ana yanglutsü. Suspension apu design ji PWD (R&B)-i yanglutsü aser NSDMA nem agütsütsü, aser apu atema osettemji NSDMA-i Guwahati mesüra Kolkata nungi bener arutsü.
Ano 4th mile nung Chathe ayong ajangdanga gari tilatem senzütsü asoshi khen atema bamboo bridge ka NSDMA-i yanglutsü.
Chief Minister aser PWD (R&B) Minister nati 4th Mile aser Nagarjan nung apu yangluba maparenji tangsa tenzüktsü tuyuogo.
Senden nungsa contractor-i 4th Mile Chathe ayong aser Nagarjan nung apuji sangküm June ita tashi nungbo yangluzüktsü, ta metetdaktsü.
Ano PWD, NHIDCL aser BRO nungi engineer temi akümba technical team kati New Dhansiri Bridge reprangshitsü.
Ano külen Kohima nunga CE, PWD (R&B)-i Secretariat nungi Nagaland Legislative Assembly tashi gari lenmang yanglushitsü aser jila nung tanga lenmangtema yanglushitsü.
CE, PWD (R&B)-i August 5 nü tashi nung item mapa atema osang agütsütsü aser August 13, 2017 nü tashi nungbo gari lenmangtem yangluzüktsü.
Senden nungsa, taküm tzüngluruwa mongpu ajanga state kongshiba osang tejangja SDMA-i renemtsü aser NDRF kübok senotsü teyari atema India sorkar nem temepishiba shidi agütsütsü lemtet.
Tanü iba senden nung School Education & Parliamentary Affairs Minister, Tokheho Yepthomi, Roads & Bridges Minister, Dr. Nicky Kire, Urban Development Advisor, S.I Jamir; NSDMA Advisor, Pukhayi Sumi, Chief Secretary, Pankaj Kumar; Addtl. Chief Secretary (Home), Temjen Toy, Commissioner & Secretary for Municipal Affairs, M. Patton, Dimapur Deputy Commissioner, Kesonyu Yhome, NHIDCL General Manager, A.K Gupta; PWD (NH) Chief Engineer, R. Temsu Temjen, PWD (R&B) Chief Engineer, K. Rhetso, NHIDCL Deputy General Manager, Hage Tachang, HQ 15BRTF Commander, Rajeeb Lochan, OSD for NSDMA, Johnny Ruangmei aser Contractor Rokolhou Angami nunger densema liasü.