Mo Farah-i otsü tasen yanglur

Beijing, August 22 (Agencies): Britain nunger Mo Farah-i alizüng mezüng tonga tang Beijing nung tasayadak world championships tebur 10,000m shilem indang gold medal tan agi 6 benbuba atema atonga agizüka otsü tasen ka tanü Honibar nü yangluogo.
Farah-i tan takok anguba sülen Ethiopia nunger toktepa asemer mongin 2, Kenenisa Bekele aser Haile Gebrselassie nati taoba mapang yangluba asemtepba otsüa ajangteter lir.
Daegu nung ayongba 2011 worlds indang 10,000m shilem nung Ibrahim Jeilan nem kokdaktsüba sülen Farah-i South Korea nung 5,000m takokba agizük aser London nung ayongba 2012 Olympics aser Moscow nung ayongba 2013 world championships nung tebur 5,000-10,000m naprongla indang takok marok agizüka liasü.
Worlds indang tebur 10,000 takok marok tanü maneni agizükba sülen Farah-i taruba Honibar nü agitsü ayongba tebur 5,000m shilem indang takok maroka agizüka tematiba takok marok 7 tashi agizüktsü maongka angutsüsa tang jenjang ngua lir.
Aji oda, Farah-i 5,000m gold medal-a agizükra, pa world championship indang 5,000m aser 10,000m takok marok anaben tashi atonga agizüker asemteper kija akümtsü.
Farah-i tanü 27min 01.13sec nung alizüng tonga gold agizük aser Kenya nunger ana, Geoffrey Kamworor o Paul Tanui nati mapang 27min 01.76sec aser 27min 02.83sec nung alizüng tonga silver aser bronze medal agizüka liasü.
Ano külen, Germany tsür Christina Schwanitz-ia tetsür shot put gold medal tanü agizükba osanga jangjaogo.
Küm 2 tejaklen Moscow nung ayongba world athletics asayamong nung silver medal angula, Christina-i tanü shot put metre 20.37 ondoka tetokteper ajak rong nung shot put talangtiba ondoker aküm.
Christina sülen anidaka, China tsür Gong Lijiao-i shot put metre 20.30 ondokteta silver aser America tsür Michelle Carter-i metre 19.76 ondoka bronze medal agizüka liasü.