Southeast Asian linüktemi North Korea dang tensa meraksatsü ayongzüker

(Abelen nungi) Malaysia Foreign Minister Anifah Aman, Myanmar Minister of State of Foreign Affairs U Kyaw Tin, Thailand Foreign Minister Don Pramudwinai, Vietnam Foreign Minister Pham Binh Minh, Philippine Foreign Secretary Alan Peter Cayetano, Singapore Foreign Minister Vivian Balakrishnan, Brunei Second Minister of Foreign Affairs & Trade Lim Jock Seng, Cambodia Foreign Minister Prak Sokhonn, Indonesia Foreign Minister Retno Marsudi, Laos Foreign Minister Saleumxay Kommasith aser ASEAN Secretary-General Le Luong Minh nungertem Manila, Philippines nung ‘50th Association of Southeast Asia Nations (ASEAN) Regional Forum (ARF) senden amentsü lia tangokba noksa angur.  (Manila, August 5)

Manila, August 5 (Agencies): Korean peninsula nung tensa mejungi akümba aser North Korea-i long-range missile tendangba ajanga alima nung yimjung aser security inyakyim amokmerenba atema Southeast Asian foreign minister temi tebilemtsü bena lemsatepogo.
Association of South East Asian Nations (ASEAN)-i North Korea dang United Nations Security Council indang nuclear programme telatetbatem sülen anidaktsü aser temeket nung tensa meraksatsü atema tayongzükba agütsüogo.
Foreign minister tem senden amenba sülen Hombarnü ASEAN Regional Forum (ARF) senden amentsü aser iba nung Russia, Japan, South Korea, United States, China aser North Korea dena foreign minister 27 adentsü. Iba senden nung Asian security onüktem benoka olemteptsü.
“Onoki North Korea dang ASEAN Regional Forum nung züngsem ka ama, ARF indang alizüng angateta inyaksangshitsü ayongzüker. ARF-i Asia-Pacific tesem nung yimjung alitsü, tesentaktep akagshitsü aser azükarua alitsü alizüng lir” ta Manila nung ASEAN minister tem senden nung metetdaktsü.
North Korea-i United States tonga aoba nuclear-tipped missile ka yanglutsü tebilemba yua mapa inyaker.
United States nung ketdangsertemi ashiba agi, taoba hopta North Korea-i tendangba missile ajanga ibaji akoktsü ama ajiteter.
United States-i Southeast Asian linüktem dang North Korea den tesentaktep aliba piladaktsünür. Ajisüaka, ASEAN linüktemi ashiba agi, parnok North Korea den tesentaktep tajung mali.
Manila senden nung mendenji Philippine Foreign Secretary, Alan Peter Cayetano lir aser pai ashiba agi, ASEAN-i North Korea ARF nungi mezüngdoktsü.
Iba onük dak sendaktepa aliba linüktem külemi ajurutepa senden amendang, onüktem angatetteptsü maongka angur, ta pai ashi.
South Korea dena Asian kari North Korea foreign minister, Ri Yong Ho den ajurutepa senden amentsü imlar. Pa Honibarnü Pyongyang toktsür Manila-i apusogo.
“Maongka dang ngura, ni pa dang North Korea-i rara ajungmesoba anenang ta ashitsü” ta South Korean Foreign Minister, Kang Kyung Wha-i osangbener dang ashi.
“Talisa, yimjung maparen tenzüktsü atema ni pa dang tawa onoki shidangba onük atema North Korea-i telangzüba agüjang ta ashitsü” ta Wha-isa shisem.
U.S. Secretary of State Rex Tillerson-ia Manila nung amenba senden nung adentsü aser pai China aser tanga Asian linüktem dang North Korea anema mapa takangba inyaktsü ajungshitsü.