GPK 17buba Annaul Freshers’ Social ayongzüka among

Kohima, August 05 (TYO): Tanü Government Polytechnic Kohima indang 17buba Annual Freshers’ Social mongogo, aser iba sentong nung tongti tesemdangerji Senior Budget Analyst, Finance Department, Ketoulhou Metha liasü.
Iba sentong nung jembidang Metha-i iba nüngtugu reju nung azüngtsü maongka anguba atema kaketshirtem nem tenüngsang agütsü.
Kaketshir süa alitsü mapang ya tatsü kadang, ta shia Mehta-i parnok dang shisatsü bushiba nung nendaka inyaktsüla, kechiyong ibaji ajanga nenok tarutsü tia latettsü, ta ayongzük.
“Tangar den tokteptsü aser mapa tajung angutsü atema taküm nung tazüokba nüngdaker,” ta paisa ashi.
“Asenok Khristan asüba ya kanga tia taka, kechiyong Temeshi Laishiba ajanga taküm ka koma alitsü iba indangji peria shia lir,” ta paisa ashi.
Technology dak sendakba nung pai, kaketshirtem dang shisatsü angutsü atema iba ya timi amshitsü ayongzük.
GPSUK Tir, Moasunep Longkumer-i lokti pelaa agizük aser Yinglang-i pelaa agizükba ken ka aten. Tasenpurtem tenüng nung Zhovelü Puro-i jembi aser AGS, GPSUK, Jesse K Awomi-i tepela anküp o jembia liasü.
Kasa sentong nung Mr. & Miss Fresher 2017 contest agia liasü, aser iba tetoktepba nung round ana- cultural aser formal round agiba sülen Rukuto aser Meriyani nati takok angu.
Tetendangertemji Lecturer, CSE, Hangkum Sao Chang; Lecturer, FT, Chubamenla aser Lecturer, CSE, Erenpeni Tsanglao nunger liasü.