Kohima Football League trophy aser jerseys sayaogo

Retired DGP K Kire aser Kohima Football League nung shilem agitsü aliba team tem nungi züngsemtem jerseys aser tournament trophy sayaba sentong nung shilem agidang tangokba yangi angur.

Kohima, August 5 (TYO): Kohima Football League 2017 official trophy aser iba asayamong nung shilem agitsüba telok ti indang jersey tanü Where is The Food (WTF), New Minister Hill nung DGP Nagaland Z Kire-i sayatsüogo.
Asaya meimer ka ama Kire-i sentepa aliba lokti den jembidang, iba amala asayamong ka ayongzükba atema Kohima Town Club (KTC) tenüng sanga liasü.
Taoba mapang pa football asayar ka aliba mapang bilemteta, Kire-i ashiba agi, 1963 küm North East tournament Kohima nung asayaa liasü aser kidanger state tem Naga nunger den tokteptsüsa meliasü. Ajisüaka state nung asayartem anitettsü atema club tem manitetba ajanga asenok atsüngzükogo aser tanü asüng asayartemi club mesera team ka nung züngzünga madener.
Kohima Football League (KFL) tenzükba ajanga asayartem club ka nung züngzünga adentsüba aser state nung football asaya tajungba akümtsü imlaba pai shisem. “Iba amala systematic club tem amenoktsü kanga menoadokogo ajisüaka jenjang tasen ka achaayanga tenzüktsü asoshi kodanga temonu mali, koba tetenzük tajung ka lir,” ta Kire-i ashi.
Kidanger state tem nungi ama Nagaland nungia kobi melei national aser international jenjang nung Naga nunger footballer tem asayaba angutsü, ta paisa ashi.
Kire-i maneni tarutsü nung state tenüng nung asayatsü atema lanurtem anitettsü asoshi nüngdakba lemsatep.
KFL mezüngbuba edition nung asayatsü aliba teloktem yamai alitsü: United 16 FC Kohima, Forerunners FC Thizama, Khriekesa FC Meriema, Power Comm FC Kohima, New Market FC Kohima, Ziekezuo FC Kohima, Nagabazar Kohima, Addax FC D Khel.
Iba sentong KTC Finance Secretary Mhasimhalie Mathew Yhome lenisüba kübok aka aser pai iba asayamong nung August 9 nungi tenzüaka August 31 tashi Kohima Local Ground nung asayatsü ta metetdaktsü. KTC general secretary Krodi tepela o jembi aser Technical Committee Convenor Kevielebei Paphino-i iba asayamong nung shilem agitsüba team aser ketdangsertem kulizüngtepba sentong achaayanga agi.