16-Pfütsero ACCC-i K. Therie Congress candidate asütsü shim

Dimapur, August 5 (TYO): Honibarnü 16-Pfütsero ACCC lokti senden amendang 2018 General Election nung Congress Candidate ama tokteptsü atema NPCC Tir, Kewekhape Therie shim.
Tanü senden nungsa 16-Pfütsero ACCC-i AICC Tir, Sonia Gandhi aser Tatong Tir, Rahul Gandhi na pusema nungittsü, NPCC Tir K Therie lenisüba sülen maneni anidaktsü, nübortem dang Congress party indang inyakyim aser sentongtem metetdaktsütsü aser constituency nungdang masü saka district aser state nung Congress ajungkettsü atema mapa inyaktsü onüktem bangzünga renem.
Gujarat BJP sorkari Rahul Gandhi’er convoy nung lung agi ona lungkak aitba inyakyim khukhua aitsür aser iba ajanga BJP-i kechisarena ajak nung tamakok anguba aser India democracy atema BJP ji lendong lir ta kuli sayur, ta senden nung adenertemisa bangzünga renem.
Senden nung K Therie-i o jembidang, ACCC-i pa Congress candidate asütsü shimba atema pelaba metetdaktsü. “Terenlok kecha mali. Public dangi tzüjang ka danga tonga marur. Public-i tang teinyakdak MLA tem maneni ketdangsüa aotsü memulunger” ta paisa ashi.
Nagaland nung NPF tarutsü mali kümogo aser tang parnok public atema masü saka pei taginüba atema raratepdang, telemsa adokba telok ka kümogo. NPF-i BJP ji parnok den teyariteper tajung ka ta jembi saka Dr. Shurhozelie anendaktsüba sülenbo parnoki iba olen melenshi. MLA 60-i nübortem amadokogo aser parnok portfolio atema dang bilema rarateper, ta K Therie-isa shisem.
Taruba general election nung tang teinyakdak MLA 60 takok angutsü ta meshitettsü. RSS tangatetba pusemba MLA tem nem vote magütsütsüla. NPF sorkari BJP tsübur kechiyong parnoki ochimashi inyakba ken o tem atema CBI aser NIA arutsü tsübur. Parnoki BJP den tesentaktep raksara, MLA tem anema bushisüngdang asütsü. Centre nung BJP-i takok anguba sülen tanü tashi Nagaland State nem teyari balaka magütsü, ta paisa ashi.
Manipur aser Goa nung BJP-i election nung takok mangu, saka Angh indang office ajanga parnoki sorkar akümtsü maongka angu aser tanga parnoki Nagaland, Arunachal Pradesh aser tanga state tem nung Angh indang office tim mesüi amshir, ta K Therie-isa shisem.
Demonetization ajanga company lakh 3 dak tema shibangogo, aluyimertem soseta asür aser India indang rongsenkettsüng kanga mejungi kongshiogo. Aluyimertem nungi tenzüker economists aser industrialists, ajaki linük nung temelenshi aginür. Congress nem maongka agütsüra, onoki nangzüka aliba ama nübortem asoshi mapa inyaktsütsü, ta paisa ashi.
Iba sentong nung National Organizing Secy., All India Seva Dal, N. Neilo Koza, Mikha Kenye, President, DCC, Phek aser Kedou Wetsah, Secy. NPCC nungertemia o jembi.