AAP Nagaland-i Kejriwal ajuru; 2018 election nung tokteptsü

Dimapur, August 05 (TYO): July 31, 2017 nü Aam Aadmi Party Nagaland nungi state Convenor, Dr. Amos Longkumer aser State otongdar, Dr. Lemwang Chuhwanglim nati anir executive züngsem 8-i AAP Convenor, Arvind Kejriwal den Rakesh Sinha-i aniba Political Affairs Committee (PAC) ajuruogo, ta tanü AAP Nagaland Media Cell-i sangdong ka ajanga metetdaktsü.
Iba senden nung AAP Nagaland-i küm ka ser tesadang nung party-i state nung inyaktetba mapatem osang metetdaktsü.
Parnoki Kejriwal dang, 2018 election atema taruba itatem nung party-i state tesem balala nung yimtenren sentongtem tenzüktsü, ta metetdaktsü.
Kejriwal-ia party tashi aittsü aser state nung yimtenren temelenshi atema yimtenren nüngdak ajak nung AAP Nagaland nungittsü, ta metetdaktsü.
Kejriwal aser AAP Nagaland-i state nung küm aika yimtenren party balala yimsüsüba kübok nbüurtem maparen aika nung sendokba nung ajemdaker nüburtem atema tang rongdak nüngdaktem jangjaogo, ta sangdong nung shia lir.
“Prangpong, sen aser tashiyim agi tai maket sensotem taküm aser vote azüokbaji vote agütsür temeten anema lir. Tang aliba party tem indang tashiji ajanga party agents aser candidate tem anogoshia takarba akümdang külenbo sensak tia aser ochimashi adokdaktsür,” ta AAP Nagaland-i metetdaktsü.
“Anungji AAP Nagaland-i Naga nungertem dang, 2018 election nung kasa sensak tia shimang mesüra senso shia shilem indang tim temeten shimang ta ajungshir,” ta parnokisa metetdaktsü.
Kejriwal aser AAP Nagaland-i 2018 election nung tokteptsü lemtetogo aser constituency aika nung takok angutsü ta temulung alemer. Takok anguba shiaji nija lenir mesüra candidate indang masü saka nüburtem indang lir, ta sangdong nungsa shia lir.
State nung voter shia dang state putiotsü nung, anogoshia takartem takarba akümba aser sensakertem tesensakba akümba agientsü atema yimtenren nung temelenshi nüngdak ta rajema vote agütsütsü ayongzüker, ta AAP Nagaland-isa metetdaktsü.