Gujarat MLA 44 Bengaluru nungi aruba sülen ano resort kati ogo

Ahmedabad, August 07, 2017: Hombar anepdang züngia Congress MLA 44 Bengaluru nungi Indigo tayimtsü ajanga Ahmedabad Airport, Gujarat tonga aruba noksa nung angur. 

New Delhi, August 07 (Agencies): Gujarat nungi Congress MLA 44 Karnataka, Bengalauru yimti tezülen resort ka nung anogo 9 nü tashi amongba sülen Hombar anepdang Ahmedabad tonga aruogo, ajisüaka asüng Rajya Sahba election agitsü lai ano parnok ajak resort kati anir ao.
MLA temji tanep 4:45 ako meta Sardar Patel International Airport tonga aru aser iba mapang nung state Congress Tir, Bharatsinh Solanki aser chief whip, Shailesh Parmar nati parnok agizük, iba sülen parnok ajak Anand district anasa aliba resort kati anir ao.
“Yangi yimdaklir timbaka Congress pusemertem lir, anungji MLA tem atema kecha tarendaktsü mali,” ta party osang ka ajanga metetdaktsü.
Rajya Sabha election agitsü lia state sorkar tashi nung aliba party, BJP nem MLA tem memesüzükdaktsütsü atema Gujarat Congress MLA temji July 29 nü Bengaluru-i anir oa liasü. Party lenir Shankersinh Vaghela-i anenba sülen Congress MLA troka anena liasü. Tang züngsem 182 aliba Gujarat assembly nung Congress MLA 57 aliba nungi MLA 51 dang kümogo.
Congress-i ashiba agi Rajya Sabha election nung Ahmed Patel-i takok angutsüsa parnoki nüngdakba MLA 45 lir, ta ashi. “Onoki nüngdakba züngsem peria lir, saka BJP züngsem peria mali,” ta Gujarat Congress lenir, Shaktisinh Gohil-i ashi.
Parmar-i, “Tanü Raksha Bhandhan anogo süaka Congress nungi matsüngshitsü atema ozü MLA ajaki kidangi maotsü lemtet. Parnoki külemi dang alitsü aser asüng Anand nungi Gandhnagar-i oa parnoki vote agütsütsü,” ta metetdaktsü.
Gujarat nungi Rajya Sabha menden asem lir, aser iba nungjagi BJP Tir, Amit Shah aser Union Minister, Smriti Irani nati melamela menden ana nung takok angutsü, aser tasembuba menden atema Patel den toktepdaktsütsü asoshi BJP-i Congress toktsüsang Balwantsinh Rajput shima lir.