Sar-e Plu anasa amakdang nübur aika tepset

Kabul, August 07 (Agencies): Northern Afghanistan nung telungpur temi civilian 50 tepset, ta ketdangser osang ka ajanga ashi.
Sar-e Plu province kübok Mirzawalang tesem nung local police temi checkpoint ka nüka alidang Brehostibarnü amak, ta iba osang Hombarnü ashi.
Item amakertemi iba sülen iba tesem anasa aliba yimtsüng kati oa Shia Muslim civilian timba sür tetsür aser tanur densema khaset, ta iba provincial indang odongtar-i ashi.
“Parnok ya meimchir yimya masüba nung taochi melie reshikangshia tepset,” ta pai-sa shisem.
Iba lendong nung Afghan mitkar 7 aser telungpur aika taküm sama, ta kasa osang ajanga ashi.
Iba lendong nung mitkar aser telungpur tsüngta ghonda 48 dak tali khatep saka tang bo tensa tazüokba nung lir, ta iba tesem nung aliba ketdangsertemi ashi.
Iba lendong agütsüba nung Taliban aser Islamic State (IS) telok den bendanger densema lir aser telok anaprong ya Sunni Muslim züngsem lir, ta odongtari ashi.
Taliban teloki civilian bo kata metepset saka sorkar busemba telok nungi züngsem 28 tepset, ta ashi saka IS nungi kicha telangzüba agüja mali.
Iba lendong agütsüba ya tejangja süra telok ana tsüngta tangatettep nung inyakba rongnung tang mezüngbuba asütsü. 2015 küm Afghanistan anüdoklen IS teloki tesep ka mesemtet aser Taliban telok dena rara aru.
Osang kar ajanga ashiba agi, North Afghanistan nungbo telok ana ya tesendaktep junga lir aser iba telok ana nung züngsem ya telok ka nungi kati melentepa aor.
Saka IS den tesendaktep mali, ta Taliban telok indang odongtar kati AFP news agency dang shia lir.
Afghan tir Ashraf Ghani-i iba lendong agütsüba ya aitsü.
“Kiralongrar temi anu civilian, tetsür aser tanurtem tepsetogo. Parnoki iba ama shiruru yimya amshiba ya nübur temeden anema lir,” ta Ghani-i ashi.
Tang tesüiba ita eshika tsüngta Afghanistan nung rara tesashiba kümogo. UN ajanga ashiba agi, Afghanistan nung küm tesadang ka tsüngta nung civilian 1,662 tepsetogo.
Iba linük nung mitkartem aser police tem yaritsü asoshi yoka aliba US mitkartem ya anu timba yokshitsü asoshi US tir, Donald Trump-i asadangba mapang ka lir.