NMBOA-i Hokivi asüba mangyimer

Dimapur, August 09 (TYO): New Market Business Owners’ Association (NMBOA)-i anojungi NMBOA Tir, H. Hokivi Chishi alima nungi pilaba atema mangyimer, ta tanü New Market Business Owners’ Association Office in-charge, Kiyegho Aye-i sangdong ka ajanga metetdaktsü.
Asür, Hokivi ya NMBOA tentetba nung tongti lenir ka lir aser pa lenisüba kübok 2003 küm tentet, aser iba mapang nungjagi pai New Market, Dimapur nung shishilembartem taküm jenjang tajungba akumtsü atema iba Association kanga melungtoka anitet, ta parnokisa metetdaktsü.
Pa lenisüba ajanga shishilembartem aser customer tem timtem onüktem benoktsü atema office ka junga amenokteta liasü.
New Market nung ozüng alema inyaker nisung tamajungertemi shishilembartem aser customer tem kanga bulua amokmerenba ajanga asür, Hokivi lenisüba nung New Market nung CCTVs inok, aser ibaji ajanga item tatalokbatem kanga ajema aküm, ta sangdong nungsa shia lir.
Market nung timtem adokba atema onoki meima aliba Tiri kanga keraa tim teinyaktsü inyak, pa asüba ajanga NMBOA atema tebuti, tesayur aser len anir ka makai kümogo, ta parnokisa ashi.
NMBOA, staff tem aser kibongtemi mangyimer kibong den mangyim jashi lemsateper aser Tsüngremi iba takoksa koktettsü atema paernok nem tashi agüjang ta sarasademtsür; onoki teti meima alisang NMBOA Tir kodak nung anisüngzükdakjangma, ta NMBOA-isa metetdaktsü.