Mongsenyimti yimdak Revival takok tulu ngua agiogo

Mongsenyimti (Mokokchung), August 09 (TYO): Mongsenyimti Baptist Arogo nung August 04 nungi 06, 2017 nü tashi Revival den repsema sensosanger ajak lumia sarasademba sentong tajung ka Tsüngremi kanga semdanga agiogo; Iba Revival ya sensotsür parnok 6-i yimer asoshi tanela nung aria bilema angati tenla tulu agüja agiba lir.
Hokolbar aonung nungi Deobar aonung tashi Revival agiba den 5th August nü prokshia aliba Mongsenyimti nunger senso ajunga anepdang 5:00 ako nungi anüngdang teroto 12:00 ako tashi mi mapui tulu-tila ajunga lumiba sentong tajung agiba ajanga sensosanger ajak temoatsü agia liasü.
Revival piyong Tsüngrem O jembir balaka mejaok saka sensotsür parnok trok- Senleminla (Kohima); Sentikokla (Kohima); N.Alila (Mokokchung); Imtikumla (Yisemyong); Temsusangla (Mon) aser Imnuksungla (Dimapur) nungeri melentepa Tsüngrem O jembiba den tanelar tejembiba O balala kuli asüba ajanga tesenteper ajak temoatsü tulu ngua mungogo.
Ya asoshi Tsüngrem dang pelar aser sensotsür shirnoki pei rongsen, nübu aser sempet agi mulungsoa tenlaba ajanga nüburtem moatsüogo parnok dang tali pelar. Maneni tanela anir aruba wadang nung Tsüngremi item sensotsürtem temaba nung ajungketa amshiang ta arogopur ajaki sarasademtsüba MBA ajanga metetdaktsü.