Hombar nü India o Nepal tsüngda MoU sign asütsü

Kathmandu, August 23 (Agencies): Nepal o India na mapang talangka nungi jembia aruba kilometre 41 talang, Amlekhgunj-Raxaul petroleum pipeline (petroleum pipeline project) India teyari agia yanglutsü asoshi Memorandum of Understanding (MoU) nung Hombar nü sign süteptsü.
Nepal nungi Minister for Commerce & Supplies Sunil Bahadur Thapa aser Indian Minister for Petroleum & Natural Gas Dharmendra Pradhan nati iba tezüngzüktep nung sign süteptsü.
Raxaul (India) nungi Amlekhgunj (Nepal) tashi petrol atema pipeline tasen yanglutsü aser Amlekhgunj Depot yanglushitsü asoshi MoU nung sign süteptsü.
Iba mapren asoshi Pradhan Deobar nü Nepal tongogo.
Nepal nung ministry of commerce & supplies ajanga ashiba agi, MoU ajanga totzü aser gas maparen nung linük ana tali sendaktepa kümdaktsütsü aser Nepal asoshi totzü dak sendakba kechisarena nung mapang talangka asoshi tetsükdaktsü madoktsü.
“Ibaji dang masü saka iba ya ajanga linük ana nüburtem tsüngda tangatettep tajungba akümtsü. Ano iba den külemi gari ajanga totzü benlendang sen intokba anentsü, totzü tokshiba malitsü aser timtem balala nungia kümzüka jenbutsü,” ta ministry-isa ashi.
India Ato Kilonser Narendra Mod-i yaküm August 3-4 tashi Nepal semdangba mapang parnoki iba pipeline yanglutsü asoshi mepishia asüngdanga liasü. Anungji linük ana tesendangtep tajung aliba ajanga India sorkari iba temepishiba mulunga agizük.
India sorkar tenüng nung India-i ‘Indian Oil Corporation (IOC)’ nem pipeline tasen yanglutsü aser Amlekhgunj Depot yanglushitsü mapa nungloktsüogo.
Iba project ya mapalem ana küma lemdanger inyaka tembangtsü.
Mezüng mapalem nung India sen crore 200 ji IOC ajanga intoka atatsü. Iba contract ya IOC aser Nepal Oil Corporation (NOC) na tsüngda küm 15 asoshi alitsü.
Amlekhgunj Depot yanglushiba nung NOC-ia India sen crore 75 enoktsü. Iba project ya India nung kilometre 39 aser Nepal nung kilometre 2 amshir.